ការចរចាដោះដូរចំណាប់ខ្មាំងរវាងអាមេរិក-អ៊ីស្រាអែល ជាមួយក្រុមហាម៉ាស់ ត្រូវបរាជ័យ

កាសែត Wall Street Journal បានរាយការណ៍ថា ការចរចាដែលពាក់ព័ន្ធនឹងសហរដ្ឋអាមេរិក និងអ៊ីស្រាអែលជាមួយក្រុមហាម៉ាស់ អំពីជោគវាសនានៃចំណាប់ខ្មាំង ៥០នាក់ មិនទទួលជោគជ័យឡើយ។ ទោះយ៉ាងណា កាលពីថ្ងៃសុក្រ ក្រុមសកម្មប្រយុទ្ធប៉ាឡេស្ទីន បានដោះលែងជនជាតិអាមេរិកពីរនាក់ឱ្យមានសេរីភាព។

របាយការណ៍ពីមន្ត្រីអនាមិកប៉ុន្មាននាក់បានអះអាងថា កិច្ចពិភាក្សារវាងអ៊ីស្រាអែល និងក្រុមហាម៉ាស់ ពុំដំណើរការទៅមុខឡើយ។ ក្នុងនោះក្រុមសកម្មប្រយុទ្ធប៉ាឡេស្ទីនបានដាក់លក្ខខណ្ឌជាច្រើនរួមមាន “បទឈប់បាញ់បណ្តោះអាសន្ន ការបន្តការផ្គត់ផ្គង់ទឹកដល់ហ្គាហ្សាដោយអ៊ីស្រាអែល និងការបង្កើនជំនួយមនុស្សធម៌ដល់ទឹកដីហ្គាហ្សា” ប៉ុន្តែនៅ​ទី​បញ្ចប់ គ្មានកិច្ច​ព្រម​ព្រៀង​ណាមួយបានកើតឡើងនោះទេ។

យ៉ាងណាក្ដី ក្រុមហាម៉ាស់បានយល់ព្រមដោះលែងចំណាប់ខ្មាំង ២នាក់ កាលពីថ្ងៃសុក្រ។ នៅក្នុងសេចក្តីថ្លែងការណ៍មួយ ក្រុមនេះបាននិយាយថា ដើម្បីឆ្លើយតបទៅនឹងកិច្ចខិតខំប្រឹងប្រែងរបស់កាតា កងពលតូច Al-Qassam របស់ហាម៉ាស់ បានដោះលែងពលរដ្ឋអាមេរិក ២នាក់សម្រាប់ហេតុផលមនុស្សធម៌។

ប្រភពពី WSJ បាន​ដក​ស្រង់​សម្ដី​មន្ត្រី​អាមេរិក​ដែល​មិន​បញ្ចេញ​ឈ្មោះ​ម្នាក់​ថា ​ថ្វីត្បិតក្រុមហាម៉ាស់ព្រមដោះលែងចំណាប់ខ្មាំង ប៉ុន្តែវាមិនបានបញ្ឈប់អ៊ីស្រាអែលឱ្យទម្លាក់គ្រាប់បែកលើតំបន់ហ្គាហ្សានោះទេ។

យោងតាមក្រុមហាម៉ាស់ បច្ចុប្បន្នពួកគេកំពុងក្ដោបក្ដាប់មនុស្សប្រហែល ២០០នាក់ ជាមួយនឹង ៥០នាក់ទៀតនៅក្នុងដៃរបស់ក្រុមសកម្មប្រយុទ្ធជាច្រើនផ្សេងទៀត ខណៈឈ្លើយសឹក​ ២០​នាក់​ត្រូវ​បាន​សម្លាប់​ដោយសារ​ការ​វាយប្រហារ​តាម​អាកាស​របស់​អ៊ីស្រាអែល ។

កាលពីដើមសប្តាហ៍នេះ មន្ត្រីជាន់ខ្ពស់របស់ហាម៉ាស់ លោក Khaled Mashaal បានស្នើថា ចំណាប់ខ្មាំងអ៊ីស្រាអែលអាចត្រូវបានដោះដូរជាមួយជនជាតិប៉ាឡេស្ទីននៅក្នុងពន្ធនាគារអ៊ីស្រាអែល ហើយជនបរទេសនឹងត្រូវបានដោះលែង នៅពេលដែលកាលៈទេសៈសមរម្យ៕

ប្រែសម្រួល៖ សន្យា

ប្រភព៖ RT

ចុចអាន៖ មនុស្សរាប់ពាន់នាក់នៅអូស្រ្តាលីចូលរួមដង្ហែក្បួនគាំទ្រប៉ាឡេស្ទីន ប្រឆាំងអ៊ីស្រាអែល