កម្លាំងជំនាញ ថៃ រកឃើញសារធាតុញៀនក្នុងខ្លួនមនុស្សជាង ១០០ នាក់នៅ​​ក្លឹប MEM Exclusive

កាលពីថ្ងៃអាទិត្យ ទី២២ ខែតុលា កម្លាំងជំនាញដឹកនាំដោយលោក Ansit Sampantarat អគ្គនាយកនៃនាយកដ្ឋានរដ្ឋបាលនៃក្រសួងមហាផ្ទៃថៃ បានធ្វើការវាយឆ្មក់ចូលក្លឹបកម្សាន្ត MEM Exclusive ក្នុង​ស្រុក Lam Luk Ka ខេត្ត Pathum Thani ហើយរកឃើញមនុស្ស ១៣៧ នាក់ផ្ទុកសារធាតុញៀន ។

ការវាយឆ្មក់ប្រព្រឹត្តទៅនៅវេលាម៉ោង ១ និង ៤៥ នាទីព្រឹក ដោយមានការគាំទ្រពីកម្លាំងជំនាញនៃការិយាល័យក្រុមប្រឹក្សាត្រួតពិនិត្យគ្រឿងញៀន និងអ្នកស្ម័គ្រចិត្តការពារទឹកដី ហើយគ្មាន​ប៉ូលិស​ណា​ម្នាក់​ចូល​រួម​ក្នុង​ប្រតិបត្តិការ​នេះនោះ​ទេ ។

ជាក់ស្ដែងមានមនុស្ស ៣០០ នាក់នៅក្នុងក្លឹប ខណៈពួកគេភាគច្រើនមានអាយុក្រោម ២០ ឆ្នាំ និង ៥ នាក់ទៀតមិនមានអត្តសញ្ញាណប័ណ្ណទេ ។ ដូច្នេះម្ចាស់ក្លឹប ព្រមទាំងអ្នកគ្រប់គ្រងជាច្រើននាក់ត្រូវបានចាប់ខ្លួន និងចោទប្រកាន់ពីបទ “បើកកន្លែងខុសច្បាប់ លក់ភេសជ្ជៈមានជាតិអាល់កុលដល់មនុស្សអាយុក្រោម ២០ ឆ្នាំ លក់ភេសជ្ជៈមានជាតិអាល់កុលក្នុងម៉ោងហាមឃាត់ និងញុះញង់យុវជនឲ្យប្រព្រឹត្តខុស” ។

ចំណែកឯអ្នកមានសារធាតុ​ញៀន​ត្រូវ​បាន​សមត្ថកិច្ច​កសាង​សំណុំរឿង​បញ្ជូន​ទៅ​សាលាដំបូង ​ដើម្បីចាត់ការ​តាម​ច្បាប់ ។

សូមជម្រាបថា ការវាយឆ្មក់ខាងលើធ្វើឡើងតាមពាក្យបណ្តឹងរបស់ប្រជាពលរដ្ឋក្នុងតំបន់ជាមួយមជ្ឈមណ្ឌល Damrongtham របស់ក្រសួងមហាផ្ទៃ ដោយបានចោទថា ហាងស្រាមួយនេះបានអនុញ្ញាតឲ្យក្មេងអាយុក្រោម ២០ ឆ្នាំចូលដោយខុសច្បាប់ ហើយបើកលក់គ្រឿងញៀនដល់ម៉ោង ៦ ព្រឹកទៀតផង ហើយជាលទ្ធផល លោក Ansit ​បាន​បញ្ជា​ឲ្យ​លោក​អភិបាល​ស្រុក​ធ្វើ​របាយការណ៍​ជូន​អភិបាល​ខេត្ត ដោយ​ស្នើ​សុំ​បិទ​កន្លែង​នេះ​រយៈពេល ៥ ​ឆ្នាំឯណោះ ៕

ប្រែសម្រួល៖ វារី

ប្រភព៖ bangkokpost

ចុចអាន៖ ឆេះក្លឹបរាត្រីនៅ ថៃ ស្លាប់មនុស្ស ១៣នាក់ របួស ៤០នាក់