អ៊ីស្រាអែល ថា ខ្លួនរកឃើញក្បួនផលិតអាវុធគីមី លើ សព សកម្មប្រយុទ្ធ ក្រុមហាម៉ាស់

ប្រធានាធិបតីអ៊ីស្រាអែល លោក Isaac Herzog បានអះអាងនៅក្នុងបទសម្ភាសរបស់ Sky News ថា ក្បួនផលិតអាវុធគីមី ត្រូវបានរកឃើញនៅលើសាកសពទាហានក្រុមហាម៉ាស់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Herzog និយាយថា អ្វីរកឃើញនៅក្នុង USB Flash ដែលក្រុមសកម្មប្រយុទ្ធហាម៉ាស់កំពុងកាន់កាប់នោះ គឺជាក្បួនរបស់ក្រុមអាល់កៃដា និយាយអំពីរបៀបបំផ្ទុះអាវុធគីមី ស្យានីតដែលជាសារធាតុគីមីពុលខ្លាំង។

វាត្រូវបានគេរកឃើញនៅតំបន់ Kibbutz Be’eri ជាកន្លែងដែលក្រុមហាម៉ាស់ បើកការវាយលុកកាលពីថ្ងៃទី៧ខែតុលា ដោយបានសម្លាប់មនុស្ស និងចាប់ចំណាប់ខ្មាំងរាប់រយនាក់។

ស្របពេលជាមួយគ្នានោះ លោក Herzog ក៏បានបង្ហោះផងដែរអំពីការអះអាងរបស់គាត់ថា “យើងកំពុងដោះស្រាយជាមួយក្រុម ISIS (ក្រុមរដ្ឋឥស្លាម) អាល់កៃដា និងហាម៉ាស់”។

ការអះអាងខាងលើកើតឡើង ចំពេលរដ្ឋមន្ត្រីការពារជាតិអ៊ីស្រាអែល លោក Yoav Gallant និយាយថា យុទ្ធនាការរបស់យោធានៅតំបន់ហ្គាហ្សា អាចចំណាយពេលមួយទៅបីខែ ប៉ុន្តែនៅចុងបញ្ចប់ ក្រុមហាម៉ាស់នឹងលែងមានមុខទៀតហើយ។

លោក​​បន្ត​ថា​ “​បើ​និយាយ​ពី​ទិដ្ឋភាព​នៃប្រតិបត្តិការនេះ គ្មានអ្វី​អាច​បញ្ឈប់​ ​កងកម្លាំង​ការពារ​អ៊ីស្រាអែល​ ឡើយ​។ នេះគួរតែជាប្រតិបត្តិការចុងក្រោយរបស់យើងនៅហ្គាហ្សា សម្រាប់ហេតុផលសាមញ្ញថា ក្រោយមកទៀតនឹងមិនមានក្រុមហាម៉ាស់ឡើយ”។

លោករដ្ឋមន្ត្រី ក៏បានសម្តែងការកោតសរសើរចំពោះកងកម្លាំងអាកាសផងដែរ ហើយនិយាយថា ដំណាក់កាលបន្ទាប់ ដែលជាប្រតិបត្តិការជើងគោក នឹងមកដល់ក្នុងពេលឆាប់ៗនេះ៕

ប្រែសម្រួល៖ Vann Vann

ប្រភព៖ BBC

ចុចអាន៖ អតីតនាយករដ្ឋមន្ត្រី អ៊ីស្រាអែល ស្នើឲ្យលោក Netanyahu លាលែងពី តំណែង