សេចក្តីរាយការណ៍៖ អាមេរិក ណែនាំឲ្យអ៊ីស្រាអែល ពន្យារពេលការវាយលុកហ្គាហ្សា តាមជើងគោកសិន

យោងតាមរបាយការណ៍របស់កាសែត New York Times បានបង្ហាញថា រដ្ឋមន្ត្រីក្រសួងការពារជាតិអាមេរិក លោក Lloyd Austin បាននិងកំពុងដាក់សម្ពាធលើអ៊ីស្រាអែល ឲ្យពន្យារពេលបើកការវាយលុកតំបន់ហ្គាហ្សា តាមជើងគោកសិន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មូលហេតុគឺថា ដើម្បីអនុញ្ញាតឲ្យកម្លាំងយោធាអាមេរិកបន្ថែមចូលក្នុងតំបន់សិន ប៉ុន្តែក៏ដើម្បីអនុញ្ញាតឲ្យមានកិច្ចខិតខំប្រឹងប្រែងការទូត ដើម្បីព្យាយាមនិងដោះលែងមនុស្សដែលក្រុមហាម៉ាស់កំពុងកាន់កាប់ជាឈ្លើយសឹកផងដែរ។

កាលពីថ្ងៃសុក្រ ក្រុមហាម៉ាស់ បានដោះលែងជនជាតិអាមេរិកពីរនាក់ ខណៈប្រធានាធិបតី ចូ បៃដិន បាននិយាយពេលលោកទៅបំពេញទស្សនកិច្ចនៅអ៊ីស្រាអែលកាលពីថ្ងៃពុធសប្តាហ៍មុនថា រដ្ឋាភិបាលសហរដ្ឋអាមេរិក កំពុងប្រើប្រាស់គ្រប់បណ្តាញ និងរាល់កិច្ចខិតខំប្រឹងប្រែងការទូត ដើម្បីព្យាយាមជួយឲ្យមានការដោះលែងមនុស្សកាន់តែច្រើន។

របាយការណ៍ខាងលើកើតឡើង ខណៈមន្ត្រីសុខាភិបាលប៉ាឡេស្ទីនអះអាងថា ជនជាតិប៉ាឡេស្ទីនប្រមាណ៤០០នាក់ ត្រូវបានសម្លាប់ដោយការវាយប្រហារអាកាសរបស់អ៊ីស្រាអែល ក្នុងរយៈពេល២៤ម៉ោងចុងក្រោយ។

អ៊ីស្រាអែលបានទម្លាក់គ្រាប់បែកលើតំបន់លំនៅដ្ឋានក្នុងទីក្រុងហ្គាហ្សា រួមទាំងជំរំជនភៀសខ្លួន Jabalia ដែលមានប្រជាជនច្រើន ក៏ដូចជាទីតាំងនៅជិតមន្ទីរពេទ្យ Al-Shifa និង Al-Quds ផងដែរ៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ អ៊ីស្រាអែល ថា ខ្លួនរកឃើញក្បួនផលិតអាវុធគីមី លើ សព សកម្មប្រយុទ្ធ ក្រុមហាម៉ាស់