លោក អូបាម៉ា៖ ទង្វើរបស់អ៊ីស្រាអែល នៅហ្គាហ្សា នឹងធ្វើឲ្យប្រជាជនប៉ាឡេស្ទីន គុំកួន តជំនាន់

អតីតប្រធានាធិបតីអាមេរិក លោក បារ៉ាក់ អូបាម៉ា បានព្រមានថា សកម្មភាពមួយចំនួនរបស់អ៊ីស្រាអែល នៅក្នុងសង្គ្រាមប្រឆាំងក្រុមហាម៉ាស់ ដូចជាការកាត់ផ្តាច់ស្បៀង និងទឹកសម្រាប់ជនស៊ីវិលនៅតំបន់ហ្គាហ្សា អាចធ្វើឲ្យប្រជាជនប៉ាឡេស្ទីន គុំកួន តជំនាន់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីថ្លែងការណ៍មួយដែលបង្ហោះលើគេហទំព័រ Medium លោក អូបាម៉ា និយាយថា សកម្មភាពទាំងនោះ អាចបំផ្លាញការគាំទ្រជាសកលសម្រាប់អ៊ីស្រាអែល សត្រូវរបស់អ៊ីស្រាអែលលូកដៃចូលអន្តរាគមន៍ក្នុងសង្គ្រាម និងធ្វើឲ្យខូចដល់កិច្ចខិតខំប្រឹងប្រែងរយៈពេលវែង ដើម្បីសម្រេចបាននូវសន្តិភាពនិងស្ថិរភាពនៅក្នុងតំបន់។

ទោះបីជាយ៉ាងណាក៏ដោយ លោកក៏បានថ្កោលទោសការវាយប្រហាររបស់ក្រុមហាម៉ាស់កាលពីថ្ងៃទី ៧ខែតុលាផងដែរ ដោយនិយាយថា លោកគាំទ្រយ៉ាងពេញទំហឹងចំពោះការអំពាវនាវរបស់ប្រធានាធិបតី ចូ បៃដិន ឲ្យសហរដ្ឋអាមេរិកប្រកៀកស្មាអ៊ីស្រាអែល ក្នុងការប្រឆាំងក្រុមប៉ាឡេស្ទីន។ លោក​បន្ថែម​ថា​ “​អ៊ីស្រាអែល​មាន​សិទ្ធិ​​ការពារ​ពលរដ្ឋ​របស់​ខ្លួន ​ប្រឆាំង​នឹង​អំពើ​ហិង្សា​បែប​នេះ”​។

សូមបញ្ជាក់ លោក អូបាម៉ា គឺជាប្រធានាធិបតីទី៤៤របស់សហរដ្ឋអាមេរិក កាន់តំណែងពីឆ្នាំ២០០៩ដល់២០១៧។ លោកជាសមាជិកនៃគណបក្សប្រជាធិបតេយ្យ និងជាប្រធានាធិបតីមានដើមកំណើតអាហ្វ្រិកដំបូងគេ របស់សហរដ្ឋអាមេរិក។

ក្នុងនាមជាប្រធានាធិបតី លោក អូបាម៉ា បានប៉ះទង្គិចជាញឹកញាប់ លើគោលនយោបាយជាមួយនាយករដ្ឋមន្ត្រីអ៊ីស្រាអែល Benjamin Netanyahu ដែលនាំឲ្យកិច្ចខិតខំប្រឹងប្រែងបន្តការចរចាសន្តិភាពអ៊ីស្រាអែល-ប៉ាឡេស្ទីនឡើងវិញ ត្រូវបរាជ័យ”៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ ក្រុមហាម៉ាស់ ដោះលែងចំណាប់ខ្មាំង២នាក់ទៀត សុទ្ធជាស្រ្តីវ័យចំណាស់