ក្រុមហាម៉ាស់ ដាក់លក្ខខណ្ឌ ដោះលែងចំណាប់ខ្មាំងទាំងអស់

អ្នកចរចាដ៏សំខាន់របស់ចលនាហាម៉ាស់ លើជោគវាសនានៃចំណាប់ខ្មាំងជាង២០០នាក់ដែល ក្រុមនេះឃុំខ្លួនក្នុងតំបន់ហ្គាហ្សា បាននិយាយថា ជនស៊ីវិលទាំងអស់នឹងត្រូវដោះលែង ប្រសិនបើមានការធ្វើតាមលក្ខខណ្ឌត្រឹមត្រូវ។

លោក Khaled Meshaal គឺជាឥស្សរជនដ៏មានឥទ្ធិពលម្នាក់នៅក្នុងក្រុមហាម៉ាស់ ដែលបានរួចរស់ជីវិតពីការប៉ុនប៉ងរបស់អ៊ីស្រាអែល ដើម្បីធ្វើឃាតគាត់កាលពីជិតបីទសវត្សរ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសន៍ជាមួយទូរទស្សន៍លោកខាងលិចជាលើកដំបូង ចាប់តាំងពីការវាយប្រហារថ្ងៃទី៧ខែតុលា លោកបានប្រាប់ Sky News ថា ជនស៊ីវិលដែលកំពុងស្ថិតនៅក្នុងកណ្តាប់ដៃក្រុមហាម៉ាស់ នឹងត្រូវដោះលែងប្រសិនបើអ៊ីស្រាអែល កាត់បន្ថយការទម្លាក់គ្រាប់បែកលើតំបន់ហ្គាហ្សា។

លោកបន្ត “សូមឲ្យពួកគេបញ្ឈប់ការឈ្លានពាននេះសិន ហើយអ្នកនឹងឃើញតួអង្គសម្របសម្រួលដូចជាកាតា និងអេហ្ស៊ីប ក៏ដូចជាប្រទេសអារ៉ាប់មួយចំនួនទៀត រិះរកវិធីដើម្បីឲ្យពួកគេដោះលែង ហើយយើងនឹងបញ្ជូនចំណាប់ខ្មាំងត្រលប់ទៅផ្ទះរបស់ពួកគេវិញ”។

ទោះបីជាយ៉ាងណាក៏ដោយ លោកបញ្ជាក់ថា “ការដោះលែងចំណាប់ខ្មាំង មិនអាចកើតឡើងបានឡើយ បើអ៊ីស្រាអែលនៅតែបន្តវាយប្រហារតាមអាកាសឥតដកដៃបែបនេះ។ យើងចង់ឲ្យបញ្ឈប់ការទម្លាក់គ្រាប់បែក ការបំផ្លិចបំផ្លាញទាំងស្រុង ការប្រល័យពូជសាសន៍ ដូច្នេះទាហាន al Qassam អាចយកចំណាប់ខ្មាំងចេញពីកន្លែងរបស់ពួកគេបាន ហើយប្រគល់ទៅឲ្យកាកបា​ទក្រហម ឬអ្នកណាក៏ដោយ។ យើង​ត្រូវ​ការ​លក្ខខណ្ឌ​ត្រឹម​ត្រូវ ដើម្បី​ដោះលែងពួកគេ”។

ការអះអាងរបស់គាត់ កើតឡើងខណៈក្រុមហាម៉ាស់ បានដោះលែងចំណាប់ខ្មាំង២នាក់ទៀត ដែលសុទ្ធជាស្រ្តីវ័យចំណាស់។ លោកយាយ Yochved Lifshitz អាយុ៨៥ឆ្នាំនិង Nurit Cooper អាយុ៧៩ឆ្នាំ ត្រូវបានក្រុមហាម៉ាស់ដោះលែងក្នុងតំបន់ ហ្គាហ្សា បន្ទាប់ពីការឃុំឃាំងរយៈពេល១៦ថ្ងៃ៕

ប្រែសម្រួល៖ Vann Vann

ប្រភព៖ Sky

ចុចអាន៖ លោក អូបាម៉ា៖ ទង្វើរបស់អ៊ីស្រាអែល នៅហ្គាហ្សា នឹងធ្វើឲ្យប្រជាជនប៉ាឡេស្ទីន គុំកួន តជំនាន់