ចំណាប់ខ្មាំងដែលទើបដោះលែង រៀបរាប់ទង្វើរបស់ក្រុមហាម៉ាស់ចំពោះខ្លួន

ចំណាប់ខ្មាំងជនជាតិអ៊ីស្រាអែលអាយុ ៨៥ឆ្នាំម្នាក់ ដែលត្រូវបានដោះលែងដោយក្រុមសកម្មប្រយុទ្ធប៉ាឡេស្ទីន ហាម៉ាស់ បាននិយាយនៅថ្ងៃអង្គារ ទី២៤ ខែតុលា ថា គាត់ត្រូវបានគេវាយដំ ក្នុងអំឡុងពេលចាប់ជម្រិត ប៉ុន្តែបន្ទាប់មកគេបានព្យាបាលគាត់យ៉ាងល្អ ក្នុងអំឡុងពេលជាងពីរសប្តាហ៍ដែលត្រូវបានឃុំឃាំងនៅហ្គាហ្សា។

លោកយាយ Yocheved Lifshitz បាននិយាយរៀបរាប់ថា “បុរសម្នាក់វាយខ្ញុំនៅតាមផ្លូវ ថ្វីត្បិតមិនបណ្ដាលឱ្យបាក់ឆ្អឹងជំនី ប៉ុន្តែវាធ្វើឱ្យខ្ញុំឈឺចាប់យ៉ាងខ្លាំង” ។

លោកយាយប្រាប់ប្រព័ន្ធផ្សព្វផ្សាយនៅមន្ទីរពេទ្យទីក្រុង Tel Aviv ថា ក្រោយមកគ្រូពេទ្យបានទៅសួរសុខទុក្ខគាត់ និងចំណាប់ខ្មាំងផ្សេងទៀតជារៀងរាល់ពីរទៅបីថ្ងៃម្តង ដោយផ្តល់ថ្នាំពេទ្យ និងថែទាំពួកគាត់បានយ៉ាងល្អ។

លោកយាយរូបនេះបន្ថែម​ថា​ «​ក្រុមគ្រូពេទ្យ​បាន​ប្រព្រឹត្ត​ចំពោះ​យើង​ដោយ​ទន់ភ្លន់ និង​ផ្តល់​នូវ​រាល់​តម្រូវការ​របស់​យើង​»​។ នៅពេល​អ្នកកាសែតសួរថា ​ហេតុអ្វី​បាន​ជា​គាត់​ឈោង​ដៃ​ចាប់ដៃ​ពួក​សកម្មប្រយុទ្ធ​នៅពេល​ត្រូវបាន​ដោះលែង​ លោកយាយតបថា មនុស្សដែលគាត់ចាប់ដៃនោះជាមនុស្សរួសរាយរាក់ទាក់ និងចេះគួរសម ពួកគេជាអ្នកដែលមើលថែចំណាប់ខ្មាំង ពេលជាប់ឃុំ។

លោកយាយបញ្ជាក់ទៀតថា ក្រុមហាម៉ាស់បានរៀបចំអ្វីៗទុកមុនជាស្រេច មុនចាប់ចំណាប់ខ្មាំងទៅ ដោយពួកគេត្រៀមសម្ភារចាំបាច់ជាច្រើន សូម្បីតែសាប៊ូកក់សក់ ពេលចំណាប់ខ្មាំងត្រូវការ ហើយអាហារដែលចំណាប់ខ្មាំងញ៉ាំ គឺជាអាហារដែលក្រុមហាម៉ាស់ញ៉ាំដូចគ្នាដែរ ដែលវារួមមាន ឈីស គ្រីម និងត្រសក់ជាដើម៕

ប្រែសម្រួល៖ សន្យា

ប្រភព៖ CNA

ចុចអាន៖ អង្គការ Save the Children៖ កុមារ២០០០នាក់ ស្លាប់នៅហ្គាហ្សា ត្រឹម១៧ថ្ងៃ

ចុចអាន៖ ដឹងមូលហេតុ ដែលក្រុមហាម៉ាស់ ដោះលែងចំណាប់ខ្មាំងជាស្រ្តីវ័យចំណាស់ ២នាក់