អាមេរិកបារម្ភអ៊ីស្រាអែលគ្មានផែនការណ៍ច្បាស់លាស់ចំពោះការវាយលុកហ្គាហ្សា

មន្ត្រីអាមេរិកបានសម្តែងការព្រួយបារម្ភចំពោះអ៊ីស្រាអែលមិនមានផែនការដែលអាចដំណើរការល្អបានសម្រាប់ការបញ្ជូនកងកម្លាំងជើងគោកទៅកាន់តំបន់ហ្គាហ្សា ហើយកំពុងចោទសួរថាតើ IDF (កម្លាំងការពារអ៊ីស្រាអែល) អាចសម្រេចបាននូវគោលដៅក្នុងការកម្ទេចក្រុមសកម្មប្រយុទ្ធហាម៉ាសដែរឬទេ។ នេះបើយោងតាមកាសែត New York Times បានចុះផ្សាយ។

នៅក្នុងការពិភាក្សានាពេលថ្មីៗនេះជាមួយសមភាគីអ៊ីស្រាអែលលោក Yoav Gallant រដ្ឋមន្ត្រីការពារជាតិអាមេរិក លោក Lloyd Austin បានសង្កត់ធ្ងន់លើតម្រូវការចាំបាច់ មុនពេលចាប់ផ្តើមយុទ្ធនាការជើងគោកនៅក្នុងទឹកដីហ្គាហ្សា។

រដ្ឋបាលសហរដ្ឋអាមេរិក ក៏មានការព្រួយបារម្ភផងដែរថា កងកម្លាំងការពារអ៊ីស្រាអែលមិនទាន់មានផ្លូវយោធាច្បាស់លាស់ដើម្បីសម្រេចបាននូវគោលដៅរបស់នាយករដ្ឋមន្ត្រី Benjamin Netanyahu ក្នុងការលុបបំបាត់ក្រុមហាម៉ាស់នៅឡើយទេ។ ជាមួយគ្នានេះ នៅក្នុងការសន្ទនាជាមួយមន្ត្រីអ៊ីស្រាអែលចាប់តាំងពីក្រុមហាម៉ាស់វាយប្រហារកាលពីថ្ងៃទី៧ ខែតុលា ក្រុមមន្ត្រីអាមេរិកបាននិយាយថា ពួកគេមិនទាន់រកឃើញផែនការសកម្មភាពដែលអាចសម្រេចបាននៅលើតំបន់ហ្គាហ្សានោះទេ។

យោងតាមសារព័ត៌មាន Associated Press ដែលបានដកស្រង់សម្តីមន្ត្រីអាមេរិកដែលមិនបញ្ចេញឈ្មោះម្នាក់ បានឱ្យដឹងថា ឧត្តមសេនីយ៍ឯក James Glynn ដែលបញ្ជូនមកពីមន្ទីរបញ្ចកោណនឹងផ្តល់ដំបូន្មានដល់កងកម្លាំងអ៊ីស្រាអែលអំពី “វិធីកាត់បន្ថយការស្លាប់ជនស៊ីវិលនៅក្នុងសង្គ្រាមទីក្រុង” ។ ទោះជាយ៉ាងណាក៏ដោយ អ្នកសម្របសម្រួលក្រុមប្រឹក្សាសន្តិសុខជាតិ លោក John Kirby បានប្រាប់អ្នកយកព័ត៌មានកាលពីថ្ងៃចន្ទថា ទីប្រឹក្សាអាមេរិកនឹងមិនបម្រើក្នុងតួនាទីប្រយុទ្ធទេ ដោយគ្រាន់តែពិគ្រោះយោបល់ជាមួយមេបញ្ជាការអ៊ីស្រាអែលប៉ុណ្ណោះ។ មន្ត្រី​មិន​បញ្ចេញ​ឈ្មោះ​ម្នាក់​ទៀត​បាន​ប្រាប់​កាសែត New York Times ​ថា លោក Glynn នឹង​មិន​នៅ​លើ​ដី​ក្នុង​ប្រទេស​អ៊ីស្រាអែល​ទេ ប្រសិន​បើ​ការ​ឈ្លានពាន​ដី​ចាប់ផ្តើម៕

ប្រែសម្រួល៖ សន្យា

ប្រភព៖ RT

ចុចអាន៖ ចំណាប់ខ្មាំងដែលទើបដោះលែង រៀបរាប់ទង្វើរបស់ក្រុមហាម៉ាស់ចំពោះខ្លួន