អ៊ីស្រាអែល ប្រកាសមិនផ្តល់ ទិដ្ឋាការដល់មន្ត្រី UN

ប្រទេសអ៊ីស្រាអែល នឹងបដិសេធផ្តល់ទិដ្ឋាការដល់មន្ត្រីអង្គការសហប្រជាជាតិ។ នេះបើតាមការព្រមានពី ឯកអគ្គរដ្ឋទូតរបស់ប្រទេសប្រចាំ UN លោក Gilad Erdan។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភាពចម្រូងចម្រាសនេះ កើតឡើងបន្ទាប់ពីប្រមុខ UN បានរិះគន់អ៊ីស្រាអែលដោយប្រយោល ចំពោះបទបញ្ជាឲ្យមានការជម្លៀសជនស៊ីវិល ពីភាគខាងជើងទៅភាគខាងត្បូងតំបន់ហ្គាហ្សាស្ទ្រីប ហើយនិយាយថា ការវាយប្រហាររបស់ក្រុមហាម៉ាស់កាលពីថ្ងៃទី៧ខែតុលា មិនអាចយកជាលេសបានឡើយ។

លោក Erdan បានប្រាប់វិទ្យុ Army Radio ថា “ដោយសារតែការកត់សម្គាល់របស់គាត់ Guterres យើងនឹងបដិសេធផ្តល់ទិដ្ឋាការដល់តំណាង UN។ យើងបានបដិសេធទិដ្ឋាការសម្រាប់អគ្គលេខាធិការរងទទួលបន្ទុកកិច្ចការមនុស្សធម៌លោក Martin Griffiths រួចទៅហើយ។ ពេលវេលាបានបង្រៀនយើង”។

មុននេះ លោក Erdan ក៏បានទាមទារឲ្យអគ្គលេខាធិការ UN លោក Antonio Guterres ចុះចេញពីតំណែងផងដែរ ដោយចោទប្រកាន់ថា គាត់កាន់ជើង ថែមទាំងបង្ហាញក្តីអាណិតអាសូរចំពោះក្រុមសកម្មប្រយុទ្ធ និងឃាតករ។

លោក Erdan បានបង្ហោះក្នុងបណ្តាញសង្គម X ថា “អគ្គលេខាធិការរូបនេះ មិនសមដឹកនាំ UN ទេ។ ខ្ញុំ​សូម​អំពាវនាវឲ្យ​គាត់​លាលែង​ពី​តំណែង​ជា​បន្ទាន់។ គ្មានហេតុផល ត្រូវនិយាយទៅកាន់អ្នកដែលបង្ហាញក្តីអាណិតអាសូរ ចំពោះអំពើឃោរឃៅដ៏អាក្រក់បំផុត ដែលបានប្រព្រឹត្តលើពលរដ្ឋអ៊ីស្រាអែល និងប្រជាជនជ្វីហ្វ ឡើយ”។

លោកបន្តថា “សុន្ទរកថាដ៏គួរឲ្យភ្ញាក់ផ្អើលរបស់លោក Guterres គឺជាព័ស្តុតាងបង្ហាញថា អគ្គលេខាធិការរូបនេះ ត្រូវបានផ្តាច់ទាំងស្រុងពីការពិតនៅក្នុងតំបន់របស់យើង ហើយថា គាត់ចាត់ទុកការសម្លាប់រង្គាលដែលប្រព្រឹត្តដោយក្រុមណាស៊ីហាម៉ាស់ ក្នុងលក្ខណៈខុសឆ្គង និងអសីលធម៌”៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ អ៊ីស្រាអែល ទាមទារឲ្យប្រមុខ UN ចុះចេញពីតំណែងជាបន្ទាន់ ព្រោះកាន់ជើងក្រុម ហាម៉ាស់