អ៊ីស្រាអែលមានះមិនផ្គត់ផ្គង់ប្រេងឱ្យតំបន់ហ្គាហ្សា និងប្រាប់ UN ឱ្យសុំពីក្រុមហាម៉ាស់

អ៊ីស្រាអែល​បាន​ចំអក​ដល់​ស្ថាប័ន UN ដែល​ទទួល​ខុសត្រូវ​ក្នុង​ការ​ជួយ​ប្រជាជន​នៅ​តំបន់ ហ្គាហ្សា ដោយ​អះអាង​ថា ពួកគេ​គួរតែ​ងាក​ទៅរក​អង្គការ​សកម្មប្រយុទ្ធ​សម្រាប់​ការផ្គត់ផ្គង់ឥន្ទនៈនៅក្នុងតំបន់។

ទីភ្នាក់ងារជំនួយ និងការងាររបស់អង្គការសហប្រជាជាតិ សម្រាប់ជនភៀសខ្លួនប៉ាឡេស្ទីន នៅតំបន់ជិតបូព៌ា (UNRWA) គួរតែស្នើសុំប្រេងឥន្ធនៈដល់ក្រុមហាម៉ាស់ ដែលនេះជាការប្រកាសរបស់កងកម្លាំងការពារអ៊ីស្រាអែល (IDF) ជាការឆ្លើយតបទៅនឹងការអំពាវនាវសម្រាប់ជំនួយមនុស្សធម៌របស់ទីភ្នាក់ងារនេះ។

កងកម្លាំងការពារអ៊ីស្រាអែល បាននិយាយនៅលើបណ្ដាញ X ឱ្យ UN សួរក្រុមហាម៉ាស់បន្តិចទៅតើអាចផ្ដល់ឥន្ធនៈដល់មន្ទីរពេទ្យនៅហ្គាហ្សាបានឬអត់ ដោយបន្ថែមជាមួយរូបភាពផ្កាយរណបនិងសំណេរបញ្ជាក់ថា “ធុងឥន្ធនៈរាប់សិបធុងកំពុងស្ថិតនៅក្នុងតំបន់ហ្គាហ្សា ហើយពួកវាផ្ទុកប្រេងឥន្ធនៈដល់ទៅជាង ៥០ម៉ឺនលីត្រឯណោះ” ។

ការឆ្លើយតបបានកើតឡើង បន្ទាប់ពីទីភ្នាក់ងារ UNRWA បានបង្ហោះថា ប្រសិនបើខ្លួនមិនទទួលបានប្រេងឥន្ធនៈជាបន្ទាន់ទេ ប្រតិបត្តិការរបស់ខ្លួននៅតំបន់ហ្គាហ្សាស្ទ្រីប នឹងត្រូវបញ្ឈប់ចាប់ពីយប់ថ្ងៃពុធតទៅ។

យោងតាមក្រសួងសុខាភិបាលហ្គាហ្សា គិតត្រឹមល្ងាចថ្ងៃអង្គារ ប្រជាជនប៉ាឡេស្ទីនសរុបចំនួន ៥,៧៩១នាក់ត្រូវបានសម្លាប់ និង ១៦,៣០០នាក់ផ្សេងទៀតបានរងរបួស ចាប់តាំងពីថ្ងៃទី៧ ខែតុលា ឆ្នាំ២០២៣៕

ប្រែសម្រួល៖ សន្យា

ប្រភព៖ RT

ចុចអាន៖ មន្ទីរពេទ្យនៅតំបន់ ហ្គាហ្សា កំពុងក្លាយជាផេះផង់ និងដួលរលំទាំងស្រុង

ចុចអាន៖ អ៊ីស្រាអែល-ប៉ាឡេស្ទីន តឹងសរសៃ ក ដាក់គ្នានៅក្រុមប្រឹក្សាសន្តិសុខ UN