រុស្ស៊ី ហាត់សមវាយប្រហារនុយក្លេអ៊ែរ ទ្រង់ទ្រាយធំ

តាមការបញ្ជាក់ពីវិមានក្រឹមឡាំង, ប្រទេសរុស្ស៊ី បានហាត់សមសមត្ថភាពរបស់ខ្លួន ក្នុងការវាយប្រហារនុយក្លេអ៊ែរទ្រង់ទ្រាយធំ កាលពីថ្ងៃពុធទី២៥ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រដ្ឋមន្ត្រីក្រសួងការពារជាតិ លោក Sergei Shoigu បាននិយាយថា សមយុទ្ធយោធានេះ គឺពាក់ព័ន្ធនឹងការឆ្លើយតប ទៅនឹងការវាយប្រហារនុយក្លេអ៊ែររបស់សត្រូវ។

រឿងនេះកើតឡើង ចំពេលរដ្ឋសភារុស្ស៊ី បានគាំទ្រការដកខ្លួនចេញពីការផ្តល់សច្ចាប័នរបស់ទីក្រុងមូស្គូ លើសន្ធិសញ្ញាសកល ដែលហាមប្រាមរាល់ការធ្វើតេស្តក្បាលគ្រាប់នុយក្លេអ៊ែរ។

លោក Shoigu ក៏បានរាយការណ៍អំពីសមយុទ្ធនេះ ទៅលោកប្រធានាធិបតី វ្លាឌីមៀរ ពូទីន ផងដែរ។

សេចក្តីថ្លែងការណ៍របស់វិមានក្រឹមឡាំងនិយាយថា “ការបាញ់បង្ហោះជាក់ស្តែង នៃមីស៊ីលបាលីស្ទិក និងមីស៊ីលផ្លោង បានកើតឡើង។ មីស៊ីលផ្លោងអន្តរទ្វីប Yars ត្រូវបានបាញ់ចេញពីទីតាំងសាកល្បងមួយ នៅចុងភាគខាងកើតប្រទេសរុស្ស៊ី ហើយមីស៊ីលមួយទៀតត្រូវបាញ់ចេញពីនាវាមុជទឹកដើរដោយថាមពលនុយក្លេអ៊ែរនៅសមុទ្រ Barents”។

កាលពីដើមខែនេះ លោក ពូទីន ក៏និយាយដែរថា រុស្សីបានធ្វើការសាកល្បងដោយជោគជ័យ នូវមីស៊ីលដែលដើរដោយថាមពលនុយក្លេអ៊ែរ។

អាវុធដែលប្រកាសជាលើកដំបូងក្នុងឆ្នាំ២០១៨នោះ ត្រូវបានគេសាទរថា មានកម្លាំងគ្មានដែនកំណត់ ប៉ុន្តែលោកពូទីន មិនបានបញ្ជាក់ច្បាស់ថាតើ វាមានសមត្ថភាពអស្ចារ្យកម្រិតណានោះទេ៕

ប្រែសម្រួល៖ Vann Vann

ប្រភព៖ BBC

ចុចអាន៖ បក្សប្រឆាំងរុស្ស៊ី ព្រមានថា លោក ពូទីន មិនមែនគំរាមលេងៗទេ រឿងបាញ់នុយក្លេអ៊ែរ