ជនសង្ស័យវាយប្រហារនៅអាមេរិក គឺជាគ្រូបង្ហាត់បាញ់កាំភ្លើង

ជនសង្ស័យដែលបើកការបាញ់សម្លាប់រង្គាលមនុស្ស២២នាក់នៅរដ្ឋ Maine ត្រូវបានប៉ូលិសកំណត់អត្តសញ្ញាណថា មានឈ្មោះ Robert Card អាយុ៤០ឆ្នាំមកពីទីក្រុង Bowdoin។​ គាត់គឺជាគ្រូបង្ហាត់បាញ់កាំភ្លើងកងទ័ពបម្រុង ប៉ុន្តែគេសង្ស័យថា គាត់មានបញ្ហាផ្លូវចិត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីរដូវក្តៅលោក Card ត្រូវបានផ្ទេរទៅផ្នែកផ្សេង បន្ទាប់ពីគាត់រាយការណ៍ថា គាត់បានឮហាក់ដូចជាសំឡេងមនុស្សខ្សឹបដាក់ត្រចៀករបស់គាត់។

យោងតាមមជ្ឈមណ្ឌលព័ត៌មាននិងវិភាគរដ្ឋ Maine, គាត់ក៏ធ្លាប់គំរាមបាញ់ប្រហារនៅមូលដ្ឋានឆ្មាំជាតិរបស់គាត់ក្នុងទីក្រុង Saco ផងដែរ។

លោក Card ត្រូវបានប៉ូលិសរដ្ឋ Maine ចាត់ទុកជា “មនុស្សតាមប្រមាញ់” ក្រោយហេតុការណ៍បាញ់ប្រហារនៅមជ្ឈមណ្ឌលកម្សាន្តនិងភោជនីយដ្ឋាន ក្នុងទីក្រុង Lewiston។

ជនសង្ស័យបាញ់ប្រហារ គឺមានប្រដាប់ដោយកាំភ្លើងប្រភេទ AR 15 ភ្ជាប់ជាមួយឡាស៊ែរអុបទិក ពេលដែលគាត់សម្រុកចូលមជ្ឈមមណ្ឌលលេងកីឡាប៊ូលីងនៅម៉ោង៧និង១៥នាទីយប់ (ពេលវេលានៅអាមេរិក) ដើម្បីចាប់ផ្តើមការវាយប្រហាររបស់គាត់។

យោងតាមស្ថិតិចងក្រងដោយអង្គការ Gun Violence Archive បានបង្ហាញថា ការបាញ់ប្រហារទ្រង់ទ្រាយធំខាងលើ ត្រូវបានគេដាក់ឈ្មោះថាជាការបាញ់ប្រហារសម្លាប់មនុស្សច្រើនបំផុតនៅអាមេរិកក្នុងឆ្នាំ២០២៣។

យោងតាមតួលេខផ្លូវការ, រដ្ឋ Maine មានករណីឃាតកម្មសរុប២៩លើកក្នុងឆ្នាំ២០២២, ក្នុងនោះមាន១៥លើកពាក់ព័ន្ធនឹងបញ្ហាក្នុងគ្រួសារ៕

ប្រែសម្រួល៖ Vann Vann

ប្រភព៖ Daily Mail, Sputnik, Samaa

ចុចអាន៖ អ្នកស្លាប់ពីការបាញ់ប្រហារនៅ អាមេរិក កើនដល់ ២២ នាក់ ខណៈប៉ូលិស កំពុងតាមប្រមាញ់ខ្មាន់កាំភ្លើង