អាមេរិក ថា យន្តហោះចិន បានចូលមកកៀកយន្តហោះទម្លាក់គ្រាប់បែករបស់ខ្លួន ប៊ិះនឹងបុកគ្នា

កាលពីថ្ងៃព្រហស្បតិ៍ទី២៦ខែតុលា យោធាអាមេរិក និយាយថា យន្តហោះរបស់ចិនមួយគ្រឿង បានចូលកៀកយន្តហោះទម្លាក់គ្រាប់បែកអាមេរិក នៅលើសមុទ្រចិនខាងត្បូង ដែលជាផ្នែកមួយនៃអ្វីដែលទីក្រុងវ៉ាស៊ីនតោននិយាយថា ជាអាកប្បកិរិយាប្រថុយប្រថានកាន់តែខ្លាំងឡើង ដោយយន្តហោះយោធាចិន។

តាមការបញ្ជាក់ពីយោធាអាមេរិក ហេតុការណ៍បានកើតឡើងកាលពីថ្ងៃអង្គារទី២៤ខែតុលា ដោយយន្តហោះ J-11 របស់ចិន បានចូលមកកៀកក្នុងចម្ងាយត្រឹម៣ម៉ែត្រប៉ុណ្ណោះពីយន្តហោះ B-52។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោធាអាមេរិក បានចេញសេចក្តីថ្លែងការណ៍ថា “ក្នុងអំឡុងពេលស្ទាក់ចាប់ពេលយប់ អ្នកបើកយន្តហោះចិន បានហោះហើរក្នុងលក្ខណៈមិនមានសុវត្ថិភាព និងមិនមានជំនាញ ដោយបង្ហាញសមត្ថភាពហោះហើរយន្តហោះមិនល្អ ជាមួយនឹងល្បឿនលើសកំណត់ មិនអាចគ្រប់គ្រងបានគម្លាត៣ម៉ែត្រពី B-52 ធ្វើឲ្យយន្តហោះទាំងពីរ ស្ថិតក្នុងគ្រោះថ្នាក់នៃការប៉ះទង្គិច”។

គួរបញ្ជាក់ជាថ្មីកាលពីដើមខែនេះ មន្ទីរបញ្ចកោណនិយាយថា យន្តហោះយោធាចិនបានធ្វើសមយុទ្ធនៅជិតយន្តហោះអាមេរិកជិត២០០ដង ចាប់តាំងពីឆ្នាំ២០២១មក។

កាលពីសប្តាហ៍មុន ក្រសួងការពារជាតិចិនក៏បាននិយាយដែរថា ការចោទប្រកាន់របស់មន្ទីរបញ្ចកោណលើយោធារបស់ខ្លួនពីបទស្ទាក់ចាប់តាមអាកាស គឺជាការលាបពណ៌ដែលបានគិតទុកជាមុនលើប្រទេសចិន ជាមួយនឹងហេតុផលនយោបាយដ៏អាក្រក់។

ទំនាក់ទំនងរវាងចិន និងសហរដ្ឋអាមេរិក មានភាពតានតឹងខ្ពស់ ដោយបានប៉ះទង្គិចគ្នាជាបន្តបន្ទាប់ជុំវិញរឿងនានាដូចជាបញ្ហាតៃវ៉ាន់ និងកំណត់ត្រាសិទ្ធិមនុស្សរបស់ចិន ព្រមទាំងសកម្មភាពយោធារបស់ខ្លួននៅសមុទ្រចិនខាងត្បូងផងដែរ៕

ប្រែសម្រួល៖ Vann Vann

ប្រភព៖ CNA