ខឹងអ្នកជិតខាងស្ដីឲ្យ បុរសវៀតណាមម្នាក់ដុតផ្ទះគេចោល

លោក Huynh Tan Duy អាយុ ៣៧ ឆ្នាំ រស់នៅទីក្រុង Can Tho ត្រូវបានចាប់ខ្លួនកាលពីថ្ងៃព្រហស្បតិ៍ ទី២៦ ខែតុលា ពីបទខ្ទាស់សោផ្ទះអ្នកជិតខាង រួចចាក់សាំងដុត ខណៈមានមនុស្ស ៧ នាក់នៅខាងក្នុង ។

ដំបូង Duy បានឈ្លោះប្រកែកជាមួយអ្នកជិតខាងដែលជាបុរសវ័យ ៣៩ ឆ្នាំ កាលពីយប់ថ្ងៃអង្គារ ទី២៤ ដោយសារគេស្ដីឲ្យគាត់រឿងបើកទ្វារខ្លាំងៗ បណ្ដាលឲ្យកូនប្រុសអាយុ ១ ខួបរបស់អ្នកជិតខាងយំ ។

ដោយមិនអស់ចិត្តនឹងជម្លោះ Duy បានរង់ចាំរហូតដល់ពាក់កណ្តាលអធ្រាត្រ ហើយខ្ទាស់សោផ្ទះអ្នកជិតខាងពីក្រៅ ទើបធ្វើសកម្មភាពដុតតែម្ដង ។

គ្រានោះមានអ្នកជិតខាងម្នាក់ទៀតឈ្មោះ Nguyen Van Diep បានប្រទះឃើញ ក៏ស្រែកដាស់ជនរងគ្រោះឲ្យងើប ប៉ុន្តែចេញក្រៅមិនកើតឡើយព្រោះជាប់សោហើយ ។ យ៉ាងណាមិញមិនមាននរណាម្នាក់បាត់បង់ជីវិតទេ គ្រាន់តែរបួសដោយសារមាន ២ នាក់លោតពីជាន់ទីពីរមក ចំណែកឯ ៥ នាក់ទៀតចេញតាមទ្វារក្រោយ ។

ហេតុការណ៍នេះធ្វើឲ្យប៉ូលិសបញ្ជូនកងកម្លាំងមក ២០ នាក់ដើម្បីជម្លៀសប្រជាជន និងឡានទឹក ៥ គ្រឿង ដោយប្រើពេលពន្លត់អស់រយៈពេល ២០ នាទី ។

ដូច្នេះអគ្គិភ័យ​ខាងលើបាន​បំផ្លាញ​ម៉ូតូអស់​ ៣ ​គ្រឿង និង​សម្ភារ​មួយចំនួន​ក្នុងផ្ទះ​ ដែលខូចខាត​អស់​ទឹកប្រាក់​ជិត ៨ ១២៦ ​ដុល្លារឯណោះ ៕

ប្រែសម្រួល៖ វារី

ប្រភព៖ vnexpress

ចុចអាន៖ មនុស្សប្រហែល ៥០០ នាក់ រត់គេចពីភ្លើងឆេះសាលអាពាហ៍ពិពាហ៍នៅ វៀតណាម