ក្រុមហាម៉ាស់ បញ្ជាក់ជំហរ មិនដោះលែងចំណាប់ខ្មាំងដាច់ខាត លុះត្រាមានបទឈប់បាញ់

សមាជិកនៃគណៈប្រតិភូក្រុម ហាម៉ាស់ ដែលកំពុងបំពេញទស្សនកិច្ចនៅទីក្រុងមូស្គូ បានគូសបញ្ជាក់ថា ក្រុមនេះ មិនអាចដោះលែងចំណាប់ខ្មាំងបានឡើយ រហូតដល់មានកិច្ចព្រមព្រៀងបទឈប់បាញ់។

ស្របពេលជាមួយគ្នានោះ លោក Abu Hamid របស់ក្រុមហាម៉ាស់និយាយថា ការទម្លាក់គ្រាប់បែករបស់អ៊ីស្រាអែលទៅលើតំបន់ហ្គាហ្សា បានសម្លាប់ចំណាប់ខ្មាំងចំនួន៥០នាក់ ហើយថា ក្រុមនេះត្រូវការពេលវេលាដើម្បីកំណត់ទីតាំងមនុស្សទាំងអស់ ដែលត្រូវបាននាំទៅហ្គាហ្សា ដោយក្រុមប៉ាឡេស្ទីនផ្សេងទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងនេះកើតឡើង បន្ទាប់ពីប្រព័ន្ធ​ផ្សព្វផ្សាយ​អ៊ីស្រាអែល Haaretz រាយការណ៍ថា ចំណាប់ខ្មាំងមួយចំនួនធំដែលក្រុមប្រដាប់អាវុធប៉ាឡេស្ទីនហាម៉ាស់ចាប់ខ្លួន អាចនឹងត្រូវដោះលែងវិញក្នុងរយៈពេលយ៉ាងយូរ ២ ថ្ងៃទៀត អាស្រ័យលើវឌ្ឍនភាពនៃការចរចា។

ស្របពេលជាមួយគ្នានោះ ក្នុងសុន្ទរកថាមួយនាពេលថ្មីៗ នាយករដ្ឋមន្ត្រីអ៊ីស្រាអែលលោក Benjamin Netanyahu បានលើកឡើងថា រដ្ឋាភិបាលរបស់លោកនឹងធ្វើអ្វីគ្រប់យ៉ាងតាមដែលអាចធ្វើទៅបាន ដើម្បីរំដោះចំណាប់ខ្មាំងត្រឡប់ទៅផ្ទះវិញប្រកបដោយសុវត្ថិភាព។

ដោយឡែក កាសែត New York Times បានរាយការណ៍ថា រដ្ឋាភិបាលអាមេរិកកំពុងស្នើឲ្យអ៊ីស្រាអែលពន្យារពេលប្រតិបត្តិការវាយលុកតាមដីគោលនៅតំបន់ហ្គាហ្សា ដើម្បីផ្តល់ពេលវេលាបន្ថែមទៀតដល់រដ្ឋាភិបាលទីក្រុងវ៉ាស៊ីនតោនក្នុងការដាក់ខែលការពារដែនអាកាសសម្រាប់ការការពារកងទ័ពអាមេរិកនៅក្នុងតំបន់ ជាពិសេសវា​ក៏​នឹង​ផ្តល់​ពេល​វេលា​បន្ថែម​ទៀត​ដើម្បី​ចរចា​ដោះ​លែង​ចំណាប់​ខ្មាំងផងដែរ៕

ប្រែសម្រួល៖ Vann Vann

ប្រភព៖ Aljazeera, NHK

ចុចអាន៖ អ៊ីស្រាអែល ថា ក្រុមហាម៉ាស់ នឹងដោះលែងចំណាប់ខ្មាំងមួយចំនួនធំយ៉ាង​យូរ ២ ថ្ងៃទៀត