ប្រធានរដ្ឋសភាថ្មី អាមេរិក ដាក់ចេញការងារដំបូងផ្ដោតសំខាន់ជួយដល់ អ៊ីស្រាអែល

លោក Mike Johnson បានអំពាវនាវឲ្យមានដំណោះស្រាយគាំទ្រប្រទេសអ៊ីស្រាអែល នៅក្នុងសកម្មភាពការងារដំបូងរបស់លោកក្នុងនាមជាប្រធានរដ្ឋសភាថ្មីរបស់អាមេរិក បន្ទាប់ពីតំណែងមួយនេះទំនេរអស់រយៈពេល ៣ សប្តាហ៍ បង្កឲ្យជាប់គាំងក្នុងការអនុម័តកញ្ចប់ជំនួយនៅវិបត្តិនៅមជ្ឈិមបូព៌ា ។

លោក Johnson មកពីគណបក្សសាធារណរដ្ឋបានលើកឡើងថា “សេចក្ដីព្រាងច្បាប់ទី ១ ដែលខ្ញុំនឹងដាក់ចេញក្នុងនាមជាប្រធានរដ្ឋសភានៅពេលនេះ គឺការគាំទ្រដល់មិត្តអ៊ីស្រាអែលជាទីស្រឡាញ់របស់យើង បើទោះបីជាកន្លងមក វាហួសពេលបន្តិចក្នុងការសម្រេចបានដំណោះស្រាយណាមួយក៏ដោយ” ។

ដំណោះស្រាយនេះទទួលបានសំឡេងគាំទ្រចំនួន ៤១២ លើ ១០ សំឡេង ហើយវាសបញ្ជាក់ឲ្យឃើញជាថ្មីពីការប្ដេជ្ញាចិត្តរបស់អាមេរិកចំពោះរដ្ឋាភិបាលអ៊ីស្រាអែល ជាពិសេសក៏មានការអំពាវនាវឲ្យក្រុមប្រដាប់អាវុធប៉ាឡេស្ទីនហាម៉ាស់ដោះលែងចំណាប់ខ្មាំងគ្រប់រូបផងដែរ ។

ទោះយ៉ាងណា ក៏មានសំឡេងប្រឆាំងនឹងដំណោះស្រាយនេះផងដែរ ហើយភាគច្រើនសំឡេងទាំងនោះកើតចេញមកពីសមាជិកគណបក្សប្រជាធិបតេយ្យ ដោយក្នុងនោះពួកគេលើកឡើងថា វាមិនបានដោះស្រាយការបាត់បង់ជីវិតរបស់ពលរដ្ឋប៉ាឡេស្ទីននោះទេ វាមានតែចាក់សាំងបន្ថែមលើភ្លើងកំពុងឆេះប៉ុណ្ណោះ ។

គួរបញ្ជាក់ថា ភាពតានតឹងថ្មីដែលបានផ្ទុះឡើងនៅមជ្ឈិមបូព៌ាបានអូសបន្លាយពេលដល់សប្ដាហ៍ទី ៣ ហើយ បន្ទាប់ពីក្រុមហាម៉ាស់បានបើកការវាយប្រហារមកលើទឹកដីអ៊ីស្រាអែលចេញពីតំបន់ហ្គាហ្សាស្ទ្រីបកាលពីព្រឹកព្រលឹមថ្ងៃទី៧ ខែតុលា ដោយបានសម្លាប់មនុស្សជាង ១,៤០០ នាក់ ដែលភាគច្រើនជាជនស៊ីវិល ។

ចំណែកនៅតំបន់ហ្គាហ្សាវិញ ក្រសួងសុខាភិបាលដែលគ្រប់គ្រងដោយក្រុមហាម៉ាស់បាននិយាយថា ការឆ្លើយតបរបស់អ៊ីស្រាអែលបានសម្លាប់មនុស្សជាង ៧,៧០០ នាក់ ហើយក្នុងនោះមានក្រុមសកម្មប្រយុទ្ធហាម៉ាស់ជាង ១,៥០០ នាក់នៅក្នុងទឹកដីអ៊ីស្រាអែល ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ទីបំផុត កូនស្រីលោក ថាក់ស៊ីន កាន់តំណែងកំពូលមួយក្នុងបក្សភឿថៃ