នាយករដ្ឋមន្ត្រីថៃ និយាយបែបណា ក្រោយគេរិះគន់ខ្លាំង រឿងថើបដៃកូនស្រីលោក ថាក់ស៊ីន?

នាយករដ្ឋមន្ត្រីថៃ លោក សេដ្ឋា ថាវីស៊ីន បានច្រានចោលពាក្យរិះគន់ចំពោះការដែលគាត់ថើបដៃលោកស្រី ផែតុងតាន ស៊ីណាវ៉ាត្រា បន្ទាប់ពីលោកស្រី ត្រូវបានតែងតាំងជាមេដឹកនាំគណបក្សភឿថៃកាលពីថ្ងៃសៅរ៍ទី២៨ខែតុលា។ លោក សេដ្ឋា បញ្ជាក់ថា វាមិនពាក់ព័ន្ធរឿងនយោបាយទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឆ្លើយតបនឹងមតិរិះគន់កាលពីថ្ងៃអាទិត្យ នាយករដ្ឋមន្ត្រីរូបនេះនិយាយថា កាយវិការនេះ គ្រាន់តែជាសញ្ញានៃសេចក្តីស្រឡាញ់និងការយកចិត្តទុកដាក់របស់គាត់ចំពោះ ផែតុងតាន ប៉ុណ្ណោះ ព្រោះគាត់ចាត់ទុកលោកស្រីដូចជាគ្រួសារ។ មិនតែប៉ុណ្ណោះ គាត់និយាយថា បបូរមាត់របស់គាត់ មិនបានប៉ះដៃរបស់លោកស្រីទេ។

លោកអះអាងថា “វាជាគ្រួសារបក្សភឿថៃ ហើយឥឡូវនេះ ខ្ញុំមានមុខតំណែងជានាយករដ្ឋមន្ត្រី រីឯ ផែតុងតាន កំពុងបំពេញភារកិច្ចរបស់ខ្លួនជាប្រធានគណៈកម្មាធិការគ្រប់គ្រងថាមពលទន់ ​(Soft Power)។ យើង​យល់​ចិត្ត​គ្នា​ទៅ​វិញ​ទៅ​មក ហើយ​ថៃ​មាន​នាយក​រដ្ឋមន្ត្រី​តែ​ម្នាក់​គត់”។

អ្នករិះគន់គណបក្សភឿថៃជាច្រើន បានថ្កោលទោសសកម្មភាពបែបនេះ បន្ទាប់ពីវីដេអូឃ្លីបរបស់នាយករដ្ឋមន្ត្រីថើបដៃលោកស្រី ផែតុងតាន ត្រូវបានផ្សព្វផ្សាយ។

មនុស្សជាច្រើននិយាយថា កាយវិការនេះបង្ហាញថា ទោះបីជាលោកសេដ្ឋាជានាយករដ្ឋមន្ត្រីក៏ដោយ ប៉ុន្តែនៅតែលូនក្រាបចំពោះមេដឹកនាំបក្សភឿថៃថ្មី។ អ្នក​ផ្សេង​ទៀត ​បាន​ប្រដូច​កាយវិការ​នេះ​ទៅ​នឹង​ក្មេង​អន្ធពាល ដែល​បង្ហាញ​ការ​គោរព​ចំពោះ​មេ​ក្រុម​ម៉ាហ្វីយ៉ា៕

ប្រែសម្រួល៖ Vann Vann

ប្រភព៖ Nation

ចុចអាន៖ ទីបំផុត កូនស្រីលោក ថាក់ស៊ីន កាន់តំណែងកំពូលមួយក្នុងបក្សភឿថៃ