ក្រុមហាម៉ាស់ បញ្ចេញវីដេអូ ចំណាប់ខ្មាំងស្តីបន្ទោសរដ្ឋាភិបាលអ៊ីស្រាអែល ពេញៗមាត់

កាលពីថ្ងៃចន្ទទី៣០ខែតុលា ក្រុមហាម៉ាស់ បានបញ្ចេញវីដេអូមួយ ដែលពួកគេនិយាយថាជាចំណាប់ខ្មាំងស្ត្រីចំនួនបីនាក់ ដែលត្រូវបានចាប់ជាចំណាប់ខ្មាំង នាំទៅតំបន់ហ្គាហ្សា ក្នុងអំឡុងការវាយប្រហារថ្ងៃទី៧ខែតុលា។

អង្គុយលើកៅអីជ័រក្បែរជញ្ជាំងពណ៌ស ស្ត្រី​ម្នាក់​ក្នុង​ចំណោម​នោះ ​បាន​ស្រែក​រិះគន់​ការ​ឆ្លើយ​តប​របស់​អ៊ីស្រាអែល​ចំពោះ​វិបត្តិ​ចំណាប់​ខ្មាំង និងការដែលរដ្ឋាភិបាលមិនបានការពារពួកគេពីក្រុមភេរវកម្ម។

នៅក្នុងវីដេអូនេះ ស្ត្រីដដែលក៏បានជំរុញឲ្យនាយករដ្ឋមន្ត្រីអ៊ីស្រាអែល លោក Benjamin Netanyahu យល់ព្រមលើការដោះដូរអ្នកទោសសម្រាប់ការដោះលែងអ្នកជាប់ឃុំទាំងអស់ ផងដែរ។

ទោះបីជាយ៉ាងណាក៏ដោយ គេមិនដឹងថាតើ វីដេអូនេះថតពេលណា ឬថតនៅឯណានោះទេ។

ជាការឆ្លើយតប លោក Netanyahu បានថ្កោលទោសវីដេអូនេះថាជា “ល្បិចផ្លូវចិត្ត” ហើយប្រាប់ទៅចំណាប់ខ្មាំងជាស្ត្រីនោះថា “យើងគិតគូរពីអ្នកជាប់ជានិច្ច”។

ទន្ទឹមនោះ នាយករដ្ឋមន្ត្រីអ៊ីស្រាអែល ក៏បានបញ្ជាក់ឈ្មោះចំណាប់ខ្មាំងស្ត្រីទាំងបីនាក់នោះផងដែរថា មានឈ្មោះ Yelena Trupanob, Daniel Aloni និង Rimon Kirsht ហើយប្តេជ្ញាថា នឹងនាំយកមនុស្សដែលត្រូវបានចាប់ខ្លួន និងបាត់ខ្លួនទាំងអស់ វិលមកផ្ទះវិញ។

យោធាអ៊ីស្រាអែលបានបញ្ជាក់ថា ចំណាប់ខ្មាំងចំនួន២៣៩នាក់ ដែលមានអាយុចន្លោះពី២-៣ខែដល់៨០ឆ្នាំ គឺត្រូវបានក្រុមហាម៉ាស់ ចាប់ខ្លួនក្នុងអំឡុងការវាយប្រហារលើភាគខាងត្បូងប្រទេសអ៊ីស្រាអែលកាលពីថ្ងៃទី៧ខែតុលា។

តាំងពីពេលនោះមក អ៊ីស្រាអែលបានបើកការទម្លាក់គ្រាប់បែកឥតស្រាកស្រាន្តទៅលើតំបន់ហ្គាហ្សា ដែលបង្កឲ្យមានការភ័យខ្លាចចំពោះសុវត្ថិភាពរបស់ចំណាប់ខ្មាំង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក Netanyahu បដិសេធបទឈប់បាញ់នៅ ហ្គាហ្សា ដោយថា នេះជាពេលអ៊ីស្រាអែល ធ្វើសង្គ្រាម