មន្ត្រីជាន់ខ្ពស់ UN លាលែងពីតំណែង ព្រោះមិនពេញចិត្តស្ថាប័នខ្លួន ដែលទៅខ្លាចអំណាចអាមេរិក

នាយកការិយាល័យសិទ្ធិមនុស្សរបស់អង្គការសហប្រជាជាតិ (OHCHR) នៅទីក្រុងញូវយ៉ក លោក Craig Mokhiber បានលាលែងពីមុខតំណែង ដោយលើកឡើងពីការបរាជ័យរបស់ស្ថាប័ននេះ ក្នុងការដោះស្រាយវិបត្តិអ៊ីស្រាអែល និងប៉ាឡេស្ទីនឲ្យបានត្រឹមត្រូវ ខណៈមន្ត្រីជាន់ខ្ពស់រូបនេះថែមទាំងបានអះអាងទៀតថា UN មិនព្រមធ្វើការងាររបស់ខ្លួន តែបែរជាខ្លាចអំណាចរបស់សហរដ្ឋអាមេរិកទៅវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Mokhiber បានបញ្ជាក់ក្នុងលិខិតមួយ ផ្ញើទៅកាន់ឧត្តមស្នងការ UN ទទួលបន្ទុកសិទ្ធិមនុស្សលោក Volker Turk ថា “ជាថ្មីម្តងទៀត យើងកំពុងមើលឃើញអំពើប្រល័យពូជសាសន៍យ៉ាងច្បាស់ក្រឡែតនៅចំពោះមុខយើង ហើយអង្គការដែលយើងបម្រើការ ហាក់ដូចជាគ្មានអំណាចអ្វីសោះដើម្បីបញ្ឈប់រឿងនេះ”។

ទន្ទឹមនោះ មន្ត្រី​ខាងលើ ​បាន​និយាយ​ដោយ​ចំហ ​អំពី​សកម្មភាព​អ៊ីស្រាអែល​ដែល​កំពុង​បន្ត​នៅ​ហ្គាហ្សា​ស្ទ្រីប ​ថា​ជា “អំពើ​ប្រល័យ​ពូជសាសន៍”។

រដ្ឋាភិបាលសហរដ្ឋអាមេរិក ចក្រភពអង់គ្លេស និង អឺរ៉ុបភាគច្រើន មានជាប់ពាក់ព័ន្ធក្នុងការវាយប្រហារដ៏គួរឲ្យរន្ធត់ មិនត្រឹមតែតាមរយៈការបរាជ័យក្នុងការបំពេញកាតព្វកិច្ចអន្តរជាតិរបស់ពួកគេប៉ុណ្ណោះទេ ប៉ុន្តែក៏តាមរយៈការបំពាក់អាវុធយ៉ាងសកម្មក្នុងការវាយប្រហារ ការផ្តល់ជំនួយផ្នែកសេដ្ឋកិច្ច និងចារកម្មផងដែរ។ លើសពីនេះ ប្រព័ន្ធផ្សព្វផ្សាយលោកខាងលិច កាន់តែផ្តិតយករូបភាព ដែលបន្ទាបបន្ថោកតម្លៃប្រជាជនប៉ាឡេស្ទីនជាបន្តបន្ទាប់ ដើម្បីជួយសម្រួលដល់ការប្រល័យពូជសាសន៍ និងការឃោសនាសង្គ្រាម បង្កភាពស្អប់ខ្ពើមពូជសាសន៍ ឬសាសនា។

UN ធ្លាប់មានគោលការណ៍និងសិទ្ធិអំណាចចាក់ឫសនៅក្នុងសុចរិតភាព ដូចជាអំឡុងការរើសអើងជាតិសាសន៍នៅអាហ្វ្រិកខាងត្បូង ជាដើម ប៉ុន្តែស្ថាប័ន បានបាត់បង់នូវចំណុចទាំងនេះ អស់រយៈពេលជាច្រើនឆ្នាំមកហើយ។ UN បរាជ័យម្តងហើយម្តងទៀតក្នុងការបញ្ឈប់ការប្រល័យពូជសាសន៍ ជាឧទាហរណ៍ដូចជាព្រឹត្តិការណ៍នៅក្នុងប្រទេសរវ៉ាន់ដា និង បូស្នៀ, ការប្រល័យពូជសាសន៍ Yazidis ដោយក្រុមរដ្ឋឥស្លាម និងជនជាតិរ៉ូហ៊ីងយ៉ា នៅក្នុងប្រទេសមីយ៉ាន់ម៉ា៕

ប្រែសម្រួល៖ Vann Vann

ប្រភព៖ RT

ចុចអាន៖ UN បោះឆ្នោតគាំទ្រយ៉ាងលើសលប់ ឲ្យមានបទឈប់បាញ់មនុស្សធម៌នៅ ហ្គាហ្សា