FBI៖ ការវាយប្រហាររបស់ក្រុមហាម៉ាស់ នឹងជំរុញឲ្យការគំរាមកំហែងភេរវកម្មនៅអាមេរិក ឈានដល់កម្រិតខ្ពស់បំផុត ចាប់តាំងពី ISIS

លោក Christopher Wray នាយក FBI បាននិយាយក្នុងសវនាការសភា កាលពីថ្ងៃអង្គារទី៣០ខែតុលាថា ការវាយប្រហារដោយក្រុមហាម៉ាស់លើអ៊ីស្រាអែល នឹងជំរុញឲ្យការគំរាមកំហែងភេរវកម្មចំពោះសហរដ្ឋអាមេរិក ឈានដល់កម្រិតខ្ពស់បំផុត ចាប់តាំងពីការងើបឡើងរបស់ក្រុម ISIS កាលពីជិតមួយទសវត្សរ៍មុន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Wray និយាយថា ចាប់តាំងពីការផ្ទុះជម្លោះអ៊ីស្រាអែលនិងប៉ាឡេស្ទីននៅតំបន់ ហ្គាហ្សា កាលពីដើមខែតុលាមក អង្គការភេរវករបរទេសជាច្រើន បានអំពាវនាវឲ្យមានការវាយប្រហារប្រឆាំងនឹងជនជាតិអាមេរិកនិងលោកខាងលិច ហេតុនេះហើយ នាំឲ្យការគំរាមកំហែងដោយពួកជ្រុលនិយមនៅសហរដ្ឋអាមេរិក មានសភាពកាន់តែធ្ងន់ធ្ងរឡើងៗ។

លោក Wray បន្តថា “សកម្មភាពរបស់ក្រុមហាម៉ាស់និងសម្ព័ន្ធមិត្ត នឹងក្លាយជាការបំផុសគំនិតដែលយើងមិនធ្លាប់ឃើញសោះ ចាប់តាំងពីក្រុម ISIS បើកយុទ្ធនាការវាយប្រហារកាលពីប៉ុន្មានឆ្នាំមុនមក”។

នេះគឺជាការ​ឡើង​ ​នៅ​ចំពោះ​មុខ​គណៈកម្មាធិការ​សន្តិសុខ​មាតុភូមិនិង​កិច្ចការ​រដ្ឋាភិបាល​របស់​ព្រឹទ្ធសភា​សហរដ្ឋ​អាមេរិក ដែល​ផ្តោត​លើ​ការ​គំរាម​កំហែង​ដល់មាតុភូមិ។ ក្រុមមន្ត្រីនិយាយថា រដ្ឋាភិបាលអាមេរិក បានមើលឃើញលទ្ធភាពនៃការគំរាមកំហែងប្រឆាំងនឹងជនជាតិជ្វីហ្វមូស្លីម និងជនជាតិអាមេរិកអារ៉ាប់កាន់តែខ្លាំង ចាប់តាំងពីការប្រយុទ្ធគ្នានៅហ្គាហ្សា ផ្ទុះឡើង។

តាមការបញ្ជាក់ពីលោក Wray, ចំនួននៃការវាយប្រហារពីសំណាក់ក្រុមជីវពលដែលគាំទ្រដោយអ៊ីរ៉ង់ លើមូលដ្ឋានយោធាអាមេរិកនៅក្រៅប្រទេស បានកើនឡើងខ្ពស់ក្នុងខែនេះ។ លើសពីនេះ ការវាយប្រហារតាមអ៊ីនធឺណិតដោយអ៊ីរ៉ង់និងតួអង្គមិនមែនរដ្ឋ ប្រឆាំងសហរដ្ឋអាមេរិក ទំនងជានឹងកាន់តែអាក្រក់ទៅៗ ប្រសិនបើជម្លោះរីកធំជាងនេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ FBI បាញ់សម្លាប់បុរសម្នាក់ ដែលបង្ហោះ Facebook គំរាមប្រធានាធិបតីអាមេរិក