ចិនបង្ហូតទង់ជាតិពាក់កណ្ដាលដងដើម្បីកាន់ទុក្ខ និងលាអតីតនាយករដ្ឋមន្ត្រី Li Keqiang ជាលើកចុងក្រោយ

ទីតាំងជាច្រើនក្នុងទីក្រុងប៉េកាំង ជាពិសេសទីលាន Tiananmen នៅថ្ងៃព្រហស្បតិ៍ ទី២ ខែវិច្ឆិកានេះ បានបង្ហូតទង់ជាតិពាក់កណ្ដាលដងដើម្បីកាន់ទុក្ខ និងធ្វើពិធីលាគ្នាជាលើកចុងក្រោយទៅដល់អតីតនាយករដ្ឋមន្ត្រីចិនលោក Li Keqiang ដែលបានទទួលមរណភាពក្នុងវ័យ ៦៨ ឆ្នាំ ។

ទន្ទឹមនោះ ក្រៅពីទីលាន Tiananmen, ការបង្ហូតទង់ជាតិពាក់កណ្ដាលដងដើម្បីកាន់ទុក្ខលោក Li Keqiang ក៏ត្រូវបានធ្វើឡើងមហាសាលប្រជាជនចិន, ក្រសួងការបរទេស ព្រមទាំង​អគារ​រដ្ឋាភិបាល​ក្នុង​តំបន់នៅ​ទូទាំង​ប្រទេស ក៏ដូចជានៅតាមស្ថានទូត និងស្ថានកុងស៊ុលចិនផងដែរ ។

លោក Li Keqiang ដែលបានកាន់តំណែងជានាយករដ្ឋមន្ត្រីចិនអស់រយៈពេល ១០ ឆ្នាំ មុនពេលចូលនិវត្តន៍កាលពីខែមីនា បានទទួលមរណភាពនៅទីក្រុងសៀ់ងហៃ ដោយសារជំងឺគាំងបេះដូងកាលពីថ្ងៃសុក្រ ទី២៧ ខែតុលា ហើយភ្លាមៗនោះ សាកសពរបស់លោកក៏ត្រូវបានបញ្ជូនទៅកាន់ទីក្រុងប៉េកាំងតាមជើងហោះហើរពិសេស ។

ស្របពេលជាមួយគ្នានេះ សពរបស់លោក Li Keqiang នឹងត្រូវបូជានៅល្ងាចថ្ងៃព្រហស្បតិ៍នេះនៅក្នុងពិធីមួយដែលទំនងជានឹងមានការចូលរួមដោយផ្ទាល់ពីសំណាក់ថ្នាក់ដឹកនាំកំពូលៗរបស់ប្រទេសផងដែរ ដោយសារតែលោក Li Keqiang គឺជាសមាជិកគណបក្សកុម្មុយនីស្តចិនដ៏ឆ្នើមមួយរូប ជាទាហានដ៏ស្មោះត្រង់ម្នាក់ ជាពិសេសលោកក៏ជាអ្នកបដិវត្តន៍និយម រដ្ឋបុរស និងជាមេដឹកនាំរបស់បក្ស និងប្រទេសជាតិដ៏មានស្នាដៃផងដែរ ។

គួរបញ្ជាក់ថា លោក លោក Li Keqiang គឺជាមេដឹកនាំដែលប្រជាជនចិនគ្រប់រូបគោរពស្រឡាញ់ ដោយសារតែការអនុវត្តគោលនយោបាយសេដ្ឋកិច្ច ហើយលោកក៏បានសាងកេរ្តិ៍ឈ្មោះ ជាអ្នកដឹកនាំដែលដាក់គោលនយោបាយផ្តោតលើការកាត់បន្ថយគម្លាតទ្រព្យសម្បត្តិ និងការផ្តល់លំនៅដ្ឋានក្នុងតម្លៃសមរម្យផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ CNA

ចុចអាន ៖ ចិន នឹងបូជាសពអតីតនាយករដ្ឋមន្ត្រីលោក Li Keqiang នៅថ្ងៃព្រហស្បតិ៍​នេះ