ក្រុមហាម៉ាស់ គំរាមវាយប្រហារអ៊ីស្រាអែលឲ្យសាហាវម្តងហើយម្តងទៀតដូចថ្ងៃ៧ តុលា 

កាលពីថ្ងៃពុធទី១ខែវិច្ឆិកា មន្ត្រីជាន់ខ្ពស់ក្រុមហាម៉ាស់ បានអំពាវនាវឲ្យកម្ទេចប្រទេសអ៊ីស្រាអែល ហើយគំរាមថា នឹងធ្វើការវាយប្រហារដ៏គួរឲ្យរន្ធត់ “ម្តងហើយម្តងទៀត” ដូចថ្ងៃទី៧ខែតុលា ។

លោក Ghazi Hamad ដែលក៏ធ្លាប់កាន់តំណែងជារដ្ឋមន្ត្រីការបរទេសក្រុមហាម៉ាស់ផងដែរនោះ បាននិយាយថា អ៊ី​ស្រា​អែ​ល គឺ​ជា​ប្រទេស​មួយ​ដែល​គ្មាន​ទីតាំង​នៅ​លើ​ទឹកដី​របស់​យើង។ យើងត្រូវតែដកប្រទេសនេះចេញ។ ការកាន់កាប់ត្រូវតែបញ្ចប់ ខ្ញុំកំពុងនិយាយអំពីទឹកដីប៉ាឡេស្ទីនទាំងមូល”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅពេលសួរតាមទូរទស្សន៍លីបង់ថាតើ នេះមានន័យថាជាការបំផ្លាញប្រទេសអ៊ីស្រាអែលមែនឬអត់? លោកឆ្លើយថា “មែនហើយ! ពិតណាស់! អត្ថិភាពរបស់អ៊ីស្រាអែល គឺជាអ្វីដែលបណ្តាលឲ្យមានការឈឺចាប់ ស្រក់ឈាម និងទឹកភ្នែក”។

បុរសអាយុ៥៩ឆ្នាំរូបនេះ បន្តថា “អ៊ីស្រាអែលត្រូវតែទទួលបានមេរៀន យើងនឹងវាយប្រហារម្តងហើយម្តងទៀត។ យើងគឺ​ជា​ជនរងគ្រោះ​នៃ​ការ​កាន់កាប់​នេះ។ គ្មាន​នរណា​ម្នាក់​អាច​បន្ទោស​យើង ​ចំពោះ​រឿង​ដែល​យើង​ធ្វើ​បាននោះ​ទេ ព្រោះអ្វី​ដែល​យើង​ធ្វើ​គឺ​ត្រឹម​ត្រូវបំផុត”។

ទោះបីជាយ៉ាងណាក៏ដោយ ការគំរាមរបស់លោក បានបង្កឲ្យមានការថ្កោលទោសភ្លាមៗពីរដ្ឋមន្ត្រីការបរទេសអង់គ្លេស James Cleverly ដែលបង្ហោះលើបណ្តាញសង្គម X ថា “តើសន្តិភាពអាចកើតឡើងបានដោយរបៀបណាទៅ បើក្រុមហាម៉ាស់ នៅតែប្តេជ្ញាចិត្តកម្ទេចអ៊ីស្រាអែលអ៊ីចឹង!”។

គួរបញ្ជាក់ថា នេះមិនមែនជាលើកទី១ទេ ដែលលោក Hamad និងគ្នីគ្នា បានចេញការគំរាមបែបនេះ ពោលកាលពីឆ្នាំ២០០៦ លោកក៏ចាត់ទុកប្រទេសអ៊ីស្រាអែលជា “ជំងឺមហារីក” ដែលត្រូវតែលុបបំបាត់ចេញពីផែនដីផងដែរ៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក បៃដិន អំពាវនាវឲ្យមានបទឈប់បាញ់ អ៊ីស្រាអែល-ហាម៉ាស់