មនុស្ស ១ពាន់ស្លាប់ពីការទម្លាក់គ្រាប់បែករបស់អ៊ីស្រាអែលលើជំរំជនភៀសខ្លួន

យោងតាមក្រសួងសុខាភិបាលបានឱ្យដឹងថា ចំនួនអ្នកស្លាប់ និងរបួសពីការវាយប្រហារតាមអាកាសរបស់អ៊ីស្រាអែលលើជំរំជនភៀសខ្លួន Jabalia ក្នុងតំបន់ហ្គាហ្សាស្ទ្រីប បានកើនឡើងដល់ ១,០០០នាក់ហើយ។

នៅព្រឹកថ្ងៃព្រហស្បតិ៍ អ្នកនាំពាក្យក្រសួងលោក Ashraf Al-Qedra បាននិយាយនៅលើ Facebook ថា មនុស្ស “១,០០០នាក់ត្រូវបានសម្លាប់ រងរបួស និងបាត់ខ្លួននៅក្នុងការសម្លាប់រង្គាលនៅជំរំ Jabalia” ដែលមានទីតាំងនៅភាគខាងជើងតំបន់ហ្គាហ្សាស្ទ្រីប។

ដោយឡែកកាលពីថ្ងៃអង្គារ ក្រសួងមហាផ្ទៃហ្គាហ្សាបាននិយាយថា ការវាយប្រហារតាមអាកាសរបស់អ៊ីស្រាអែលបានបណ្តាលឱ្យ “មនុស្សស្លាប់ និងរបួស ៤០០នាក់ រួមទាំងអ្នករបួសរាប់សិបនាក់ និងការបំផ្លិចបំផ្លាញទាំងស្រុងនៃសង្កាត់លំនៅដ្ឋានមួយនៅក្នុងជំរំ Jabalia” ។

លុះដល់ល្ងាចថ្ងៃពុធ យន្តហោះចម្បាំងរបស់អ៊ីស្រាអែល បានធ្វើការវាយឆ្មក់មួយទៀត ទៅលើជំរំ ដែលបណ្តាលឱ្យមានការខូចខាតយ៉ាងធ្ងន់ធ្ងរដល់ផ្ទះរាប់សិបខ្នង។

ចាប់តាំងពីថ្ងៃទី៧ ខែតុលាមក មនុស្សជាង ១០,៣០០នាក់ហើយត្រូវបានសម្លាប់នៅក្នុងជម្លោះ ក្នុងនោះមានជនជាតិប៉ាឡេស្ទីនចំនួន ៨,៧៩៦នាក់ និងជនជាតិអ៊ីស្រាអែលប្រមាណ ១,៥៣៨នាក់៕

ប្រែសម្រួល៖ សន្យា

ប្រភព៖ Anadolu

ចុចអាន៖ UN ថា ការ​វាយ​ប្រហារ​របស់​អ៊ីស្រាអែល​ លើ​ជំរំ​ជន​ភៀស​ខ្លួន​ គឺជា​អំពើសាហាវព្រៃផ្សៃ