iPhone នៅតែលក់ដាច់ខ្លាំងក្នុងទីផ្សារ ចិន ទោះមានការប្រជែងពីក្រុមហ៊ុន Huawei

ក្រុមហ៊ុន Apple ចេញការ​ធានាដល់វិនិយោគិនថា ការលក់ iPhone នៅក្នុងទីផ្សារចិនដីគោក នៅតែមានសន្ទុះខ្លាំង​ ទោះបីជាបច្ចុប្បន្ន ក្រុមហ៊ុនបច្ចេកវិទ្យា Huawei ក៏ដូចជាក្រុមហ៊ុនស្មាតហ្វូន​ផ្សេងទៀតមានការប្រកួតប្រជែងខ្ពស់ក៏ដោយ។

លោក Tim Cook នាយកប្រតិបត្តិលើកឡើងថា នៅទីផ្សារចិនដីគោក ក្រុមហ៊ុនបានបង្កើតកំណត់ត្រាលក់ប្រចាំត្រីមាស​ខែកញ្ញារបស់ខ្លួន ដោយទូរសព្ទ iPhone របស់ក្រុមហ៊ុន Apple ស្ថិតក្នុងចំណោមស្មាតហ្វូនដែលលក់ដាច់បំផុតទាំង ៥ នៅក្នុងប្រទេសចិន ។

នាយកប្រតិបត្តិរូបនេះលើកឡើងទៀតថា ក្រុមហ៊ុន Apple ហាក់ដូចជាទទួលបានចំណែកទីផ្សារនៅក្នុងប្រទេសចិនក្នុងអំឡុងខែកក្កដាដល់ខែកញ្ញា ហើយក្រុមហ៊ុនរំពឹងថា​ ការលក់នឹងកើនឡើងច្រើននៅក្នុងត្រីមាសចុងក្រោយនៃឆ្នាំនេះ ។

ទន្ទឹមនឹងមានទីផ្សារនៅក្នុងប្រទេសចិនក៏ពិតមែន ប៉ុន្តែក្រុមហ៊ុន Apple ក៏ត្រូវប្រជែងទីផ្សារលក់ស្មាតហ្វូនរបស់ក្រុមហ៊ុន Huawei ផងដែរ ខណៈផលិតផលក្រុមហ៊ុនចិនមួយនេះលក់ដាច់ខ្លាំងផងដែរនៅក្នុងត្រីមាសនេះ ក្រោយពេលចាប់ផ្តើមវិលត្រលប់មកកាន់ទីផ្សារ​ទូរសព្ទ​ រួមជាមួយទីផ្សារបន្ទះឈីប ។

ជាក់ស្ដែង ក្រុមហ៊ុនផ្គត់ផ្គង់បន្ទះឈីបរបស់ Apple គឺ Qualcomm យល់ឃើញថា ក្នុងរយៈពេល ២ ឆ្នាំ​កន្លងទៅមានការធ្លាក់ចុះ​នៃទីផ្សារស្មាតហ្វូន ប៉ុន្តែឥឡូវនេះកំពុងមានភាពធូរស្រាលវិញ ដោយសារការស្ទុះងើបឡើងវិញនៃទីផ្សារចិន ។

ទោះយ៉ាងណា ក្រុមហ៊ុន Qualcomm ក៏កំពុងប្រឈមមុខនឹងការប្រកួតប្រជែងថ្មីពីបន្ទះឈីបរបស់ក្រុមហ៊ុន Huawei ផងដែរ ប៉ុន្តែក្រុមហ៊ុនជឿជាក់ថា ការចូលទីផ្សារឡើងវិញរបស់ក្រុមហ៊ុន Huawei នឹងប៉ះពាល់ដល់ទំនាក់ទំនងរបស់ខ្លួនជាមួយក្រុមហ៊ុនស្មាតហ្វូនចិននោះទេ ៕

ប្រែសម្រួល៖ នាង រតនៈ

ប្រភព៖​ CNA