ទេសចរ​ចិន​ ឈរនៅកំពូលតារាងដែលទៅលេងរុស្ស៊ីច្រើនជាងគេ

ភ្ញៀវទេសចរចិន បានឈរនៅលើកំពូលតារាងនៃជនបរទេសដែលទៅកម្សាន្តប្រទេសរុស្ស៊ីក្នុងរយៈពេលប្រាំបួនខែដំបូងនៃឆ្នាំ ២០២៣ បើតាមរបាយការណ៍ប្រចាំថ្ងៃរបស់ RBK ដោយដកស្រង់ទិន្នន័យពីសេវាសន្តិសុខសហព័ន្ធរបស់រុស្ស៊ី។

យោងតាមស្ថិតិ មានភ្ញៀវទេសចរបរទេសចំនួន ៤២៩,១០០ នាក់ ក្នុងរយៈពេល​​៩ខែនេះ ដោយកើនឡើងចំនួនបីដងពីឆ្នាំមុន ខណៈទេសចរចិនមានចំនួន ១០៥,៨០០ នៃចំនួនសរុប។

តួលេខនេះ កើនឡើងយ៉ាងខ្លាំងបើធៀបនឹងរយៈពេលដូចគ្នាកាលពីឆ្នាំមុន ខណៈមានទេសចរចិនតែ ៥៦៣ នាក់ប៉ុណ្ណោះ ទៅរុស្ស៊ីដោយសារជំងឺរាតត្បាត Covid-19 និងការរឹតបន្តឹងដែលបានណែនាំនៅទូទាំងពិភពលោក។

ចិនគឺជាប្រភពទេសចរដ៏ធំបំផុតរបស់រុស្ស៊ីចាប់ពីដើមទសវត្សរ៍ឆ្នាំ ២០០០ រហូតដល់ការចាប់ផ្តើមនៃជំងឺកូវីដ។ ទន្ទឹមនឹងនេះ ទេសចរចិនក៏បានជាប់ចំណាត់ថ្នាក់កំពូលនៃអ្នកចំណាយលើសកម្មភាពទាក់ទងនឹងទេសចរណ៍ក្នុងចំណោមជនបរទេសដែលធ្វើដំណើរទៅកាន់ប្រទេសរុស្ស៊ី។

កំណើននៃទេសចរចិនចូលទៅលេងរុស្ស៊ី ដោយសារតែប្រទេសទាំងពីរ បានដាក់ដំណើរការកម្មវិធី e-visa ដោយរួមចំណែកដល់កំណើននៃវិស័យទេសចរណ៍ពីប្រទេសចិនទៅកាន់ប្រទេសរុស្ស៊ីក្នុងរយៈពេលប្រាំបួនខែដំបូងនៃឆ្នាំ ២០២៣៕

ប្រែសម្រួល៖ នាង រតនៈ

ប្រភព៖​ RT