លោក Netanyahu ដាក់លក្ខខណ្ឌតែមួយគត់ ទើបយល់ព្រមឈប់បាញ់ជាមួយក្រុមហាម៉ាស

កាលពីថ្ងៃអាទិត្យទី៥ខែវិច្ឆិកា នាយករដ្ឋមន្ត្រីអ៊ីស្រាអែល លោក Benjamin Netanyahu បានទាមទារឲ្យក្រុមហាម៉ាសដោះចំណាប់ខ្មាំងជាង២៤០នាក់ជាមុនសិន ទើបបទឈប់បាញ់មួយអាចលេចចេញជារូបរាងបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Netanyahu បានប្រាប់ក្រុមនាវិកនៅឯមូលដ្ឋានទ័ពអាកាស Ramon នាភាគខាងត្បូងប្រទេសអ៊ីស្រាអែលថា “នឹងគ្មានបទឈប់បាញ់ឡើយ បើមិនមានការវិលត្រលប់របស់ចំណាប់ខ្មាំងទេនោះ។ ពាក្យនេះគួរតែត្រូវបានដកចេញទាំងស្រុងពីវចនានុក្រម។ យើងនិយាយនេះទៅកាន់មិត្តរបស់យើង និងចំពោះសត្រូវរបស់យើង។ យើងនឹងបន្តរហូតដល់យើងកម្ចាត់ពួកគេ យើងគ្មានជម្រើសផ្សេងឡើយ”។

ទោះបីជាយ៉ាងណាក៏ដោយ កាលពីប៉ុន្មានសប្តាហ៍មុន អ្នកនាំពក្យកងពលតូច Izz el-Deen al-Qassam ដែលជាសម្ព័ន្ធក្រុមហាម៉ាស លោក Abu Ubaida បានគូសបញ្ជាក់ថា ចលនានេះ នឹងដោះលែងចំណាប់ខ្មាំង ប្រសិនបើអ៊ីស្រាអែល បញ្ឈប់ការទម្លាក់គ្រាប់បែក និងដោះលែងអ្នកទោសប៉ាឡេស្ទីនទាំងអស់។

សូមបញ្ជាក់ យោធាអ៊ីស្រាអែល បានប្រើប្រាស់ទាំងកងទ័ពជើងគោក អាកាស និងជើងទឹក ដើម្បីវាយសន្ធាប់លើតំបន់ហ្គាហ្សា ហើយបង្កើនការលុកលុយរបស់ខ្លួន ចូលទៅឆ្នេរសមុទ្រដ៏តូចចង្អៀត ក្នុងគោលបំណងបំផ្លាញហេដ្ឋារចនាសម្ព័ន្ធរបស់ក្រុមហាម៉ាស និងសម្លាប់មេដឹកនាំជាន់ខ្ពស់ ក៏ដូចជាប្រព័ន្ធបញ្ជា និងការគ្រប់គ្រងរបស់ពួកគេ។

មន្ត្រីសុខាភិបាលហ្គាហ្សានិយាយថា ប្រជាជនប៉ាឡេស្ទីនជាង៩៧៧០នាក់ ត្រូវបានសម្លាប់ក្នុងសង្គ្រាមបច្ចុប្បន្ន ដែលចាប់ផ្តើម ពេលដែលក្រុមហាម៉ាស បើកការវាយប្រហារដ៏គួរឲ្យភ្ញាក់ផ្អើលមួយលើភាគខាងត្បូងប្រទេសអ៊ីស្រាអែល កាលពីថ្ងៃទី៧ខែតុលា ដោយបានសម្លាប់មនុស្ស១៤០០នាក់ និងចាប់ចំណាប់ខ្មាំងជាង២៤០នាក់៕

ប្រែសម្រួល៖ Vann Vann

ប្រភព៖ CNA

ចុចអាន៖ មិនត្រឹមជំរំជនភៀសខ្លួននិងមន្ទីរពេទ្យ ពេលនេះ អ៊ីស្រាអែល បាញ់កម្ទេចស៊ីទែនទឹក នៅហ្គាហ្សា ទៀត