WFP ព្រមានថា ស្បៀងអាហារនៅហ្គាហ្សា អាចទប់ទល់បានតែ៥ថ្ងៃទៀតប៉ុណ្ណោះ

កាលពីថ្ងៃអាទិត្យទី៥ខែវិច្ឆិកា នាយកប្រតិបត្តិកម្មវិធីស្បៀងអាហារពិភពលោក (WFP) របស់អង្គការសហប្រជាជាតិ លោកស្រី Cindy McCain បានព្រមានថា ការផ្គត់ផ្គង់ស្បៀងអាហារក្នុងតំបន់ហ្គាហ្សា នៅសល់ពេលត្រឹម៥ថ្ងៃទៀតប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

WFP និយាយថា “ការ​ទទួល​បាន​នំបុ័ង ​បានក្លាយជារឿងកាន់តែលំបាកឡើងៗ។ រោងម៉ាស៊ីនកិនស្រូវតែមួយគត់នៅហ្គាហ្សា គឺនៅតែមិនអាចកិនស្រូវសាលីបាន ដោយសារខ្វះអគ្គិសនី និងប្រេងឥន្ធនៈ។ ហាង​នំប៉័ង​ចំនួន១១​កន្លែង ​ត្រូវ​វាយ​ប្រហារ និង​បំផ្លាញ​តាំង​ពី​ថ្ងៃ​ទី៧ខែ​តុលាមក”។

ទីភ្នាក់ងារអង្គការសហប្រជាជាតិមួយនេះបន្តថា “មនុស្សបាន​តម្រង់​ជួរ​ជា​ច្រើន​ម៉ោងនៅតាម​ហាង​នំប៉័ង ទាំងដែល​ពួកគេ​ប្រឈម​នឹង​ការ​វាយប្រហារពី​អាកាស។ ការចែកចាយជំនួយស្បៀងអាហារដល់ជនភៀសខ្លួន នៅភាគខាងជើងតំបន់ហ្គាហ្សា ត្រូវបានផ្អាកស្ទើរតែទាំងស្រុ​ងក្នុងរយៈពេលប៉ុន្មានថ្ងៃចុងក្រោយនេះ បន្ទាប់ពីអ៊ីស្រាអែល ពង្រីកប្រតិបត្តិការជើងគោក។

ស្របពេលជាមួយគ្នានោះដែរ ប្រធាន WFP បានធ្វើការអង្វរករជាបន្ទាន់សម្រាប់សុវត្ថិភាព និងពង្រីកលទ្ធភាពមនុស្សធម៌ទៅកាន់តំបន់ហ្គាហ្សា នៅពេលដែលអាហារអស់។

តាមការអះអាងពីលោកស្រី Cindy McCain, “ឪពុកម្តាយនៅហ្គាហ្សា មិនដឹងថាតើពួកគេអាចចិញ្ចឹមកូនរបស់ពួកគេនៅថ្ងៃនេះដោយរបៀបណា ហើយថាតើពួកគេនឹងអាចនៅរស់ដើម្បីមើលថ្ងៃស្អែកដែរឬទេ”។

សូមបញ្ជាក់ជាថ្មី ក្រសួងសុខាភិបាលដែលគ្រប់គ្រងដោយក្រុមហាម៉ាស បានរាយការណ៍ថា នៅហ្គាហ្សាមនុស្សជិត៩៨០០នាក់ រួមទាំងស្ត្រី និងកុមារផងដែរ ត្រូវបាត់បង់ជីវិតចាប់តាំងពីថ្ងៃទី៧ខែតុលាមក៕

ប្រែសម្រួល៖ Vann Vann

ប្រភព៖ Ary​ News

ចុចអាន៖ លោក Netanyahu ដាក់លក្ខខណ្ឌតែមួយគត់ ទើបយល់ព្រមឈប់បាញ់ជាមួយក្រុមហាម៉ាស