ព័ត៌មានអន្ដរជាតិ

រុស្ស៊ី៖ មេដឹកនាំលោកខាងលិច ដឹងច្បាស់ហើយថា អ៊ុយក្រែន កំពុងលួចលុយពួកគេ

បានផុស

១១ ខែ មុន

នៅ

ថ្ងៃចន្ទ ៦ វិច្ឆិកា ២០២៣

ដោយ

អ្នកនាំពាក្យវិមានក្រឹមឡាំង លោក Dmitry Peskov និយាយថា ប្រទេសលោកខាងលិច បានដឹងយ៉ាងច្បាស់ថា មន្ត្រីអ៊ុយក្រែន កំពុងយកមូលនិធិដែលពួកគេទទួលបានពីអ្នកគាំទ្រ ដាក់ចូលទៅក្នុងហោប៉ៅ។

អ្នកនាំពាក្យវិមានក្រឹមឡាំង លោក Dmitry Peskov (រូបថត៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយអ្នកកាសែតរុស្ស៊ី Pavel Zarubin ដែលចេញផ្សាយកាលពីថ្ងៃអាទិត្យទី៥ខែវិច្ឆិកា លោក Peskov អះអាងថា មេដឹកនាំលោកខាងលិចយល់ថា ប្រាក់មួយឡែកដែលពួកគេផ្តល់ទៅឲ្យអ៊ុយក្រែន គឺត្រូវបានគេលួច ហើយរឿងនេះក៏មានអ្នកនយោបាយអាមេរិកមួយចំនួន ដឹងដែរ។

យោងតាមលោក Peskov, ពេលនេះ សមាជិកសភាអាមេរិក ត្រូវរកវិធីពន្យល់អ្នកបោះឆ្នោតថាតើហេតុអ្វី បានជាមិនមានយន្តការត្រឹមត្រូវដើម្បីត្រួតពិនិត្យការផ្តល់មូលនិធិ និងថាតើហេតុអ្វី បានជាពួកគេបិទភ្នែកចំពោះបញ្ហានេះ ហើយពិភាក្សាអំពីកញ្ចប់ជំនួយបន្ថែមទៀតទៅវិញ។

ការអត្ថាធិប្បាយរបស់លោក Peskov កើតឡើងបន្ទាប់ពីទស្សនាវដ្តី Politico រាយការណ៍កាលពីដើមខែតុលាថា រដ្ឋបាលរបស់ប្រធានាធិបតីអាមេរិក Joe Biden មានក្តីព្រួយបារម្ភខ្លាំងអំពីអំពើពុករលួយនៅក្នុងប្រទេសអ៊ុយក្រែន ទាំងដែលមិនទទួលស្គាល់ជាសាធារណៈ។

ឯកសារដ៏រសើបមួយដែលដកស្រង់ដោយទស្សនាវដ្តីនេះ បានសង្កត់ធ្ងន់ថា អំពើពុករលួយដែលកំពុងរីករាលដាលនៅក្នុងប្រទេសអ៊ុយក្រែន អាចបង្ខំឲ្យសម្ព័ន្ធមិត្តលោកខាងលិចបោះបង់ចោលទីក្រុងកៀវ ខណៈពួកគេកំពុងប្រយុទ្ធជាមួយរុស្ស៊ី៕

ប្រែសម្រួល៖ Vann Vann

ប្រភព៖ RT

ចុចអាន៖ រុស្ស៊ី ប្រកាសថា អ៊ុយក្រែន ចាញ់ហើយ!