ថៃ ព្រមានយុវវ័យពីការរួមភេទ ក្រោយរកឃើញអ្នកឆ្លងមេរោគអេដស៍កាន់តែច្រើនឡើង

នៅថ្ងៃទី៦ ខែវិច្ឆិកានេះ អគ្គនាយកដ្ឋានសុខាភិបាលនៃក្រសួងសុខាភិបាលថៃ បានព្រមានយុវវ័យឱ្យប្រុងប្រយ័ត្នខ្ពស់ យល់ដឹងពីវិធីការពារកុំឱ្យមានផ្ទៃពោះ និង ជំងឺកាមរោគក្នុងពេលរួមភេទ បន្ទាប់ពីរកឃើញថា មានយុវវ័យបានឆ្លងមេរោគអេដស៍ (HIV) កាន់តែច្រើនឡើង និងបានណែនាំអំពីរបៀបបដិសេធការរួមភេទ ដើម្បីកាត់បន្ថយហានិភ័យសម្រាប់ពួកយុវវ័យ។

លោកស្រីវេជ្ជបណ្ឌិត Atchara Nithipinyasakul អគ្គនាយកនៃអគ្គនាយកដ្ឋានសុខាភិបាលថៃបាននិយាយថា ដោយសារស្ថានការណ៍នៃការឆ្លងមេរោគអេដស៍ (HIV) និងជំងឺកាមរោគមានការកើនឡើងក្នុងចំណោមយុវវ័យ ដោយយោងតាមទិន្នន័យពីនាយកដ្ឋានគ្រប់គ្រងជំងឺឆ្លងក្នុងឆ្នាំ២០២២ ត្រូវបានរកឃើញថា មានអ្នកឆ្លងមេរោគអេដស៍ថ្មីចំនួន ៩២៣០នាក់ ដែលក្នុងនោះស្ទើរតែពាក់កណ្តាលជាក្រុមយុវវ័យ មានអាយុចាប់ពី ១៥-២៤ ឆ្នាំ។ បញ្ហានេះបានបង្កឱ្យមានការព្រួយបារម្ភដល់ប្រជាជន និងសង្គមថៃ និងអាចប៉ះពាល់នាពេលអនាគត។

ដូច្នេះហើយទើបអគ្គនាយកដ្ឋានសុខាភិបាលនៃក្រសួងសុខាភិបាលថៃបានដាក់ចេញនូវវិធានការបង្កើតការយល់ដឹងអំពីការរួមភេទសម្រាប់យុវវ័យ (ការរួមភេទដោយសុវត្ថិភាព) ដោយមានការណែនាំចំនួន៤ចំណុចគឺ៖ ១) មានការរួមភេទដោយមានការយល់ព្រម ២)ប្រសិនបើមានការរួមភេទត្រូវតែច្បាស់ខ្លួនឯងថាពិតជាមានសុវត្ថិភាព ប្រើស្រោមអនាម័យដើម្បីការពារជំងឺកាមរោគពីការរួមភេទ ៣)ប្រសិនបើភ្លាត់បណ្តាលឱ្យមានផ្ទៃពោះដោយមិនបានត្រៀមខ្លួន ត្រូវតែទៅពិគ្រោះជាមួយគ្រូពេទ្យដើម្បីទទួលបានដំបូន្មាន និង ៤)ការថែទាំសុខភាពនិងគ័រក្នុងផ្ទៃនៅមុនពេលសម្រាលប្រកបដោយគុណភាព ដើម្បីឱ្យកូនកើតមកនិងម្តាយមានសុវត្ថិភាព៕

ប្រែសម្រួល៖ គង់ សំអាន

ប្រភព៖ MCOT