ព័ត៌មានអន្ដរជាតិ

ប្រមុខ UN៖ តួលេខអ្នកស្លាប់នៅហ្គាហ្សា បង្ហាញថា ពិតជាមានអ្វីខុសហើយ ក្នុងប្រតិបត្តិការយោធារបស់អ៊ីស្រាអែល

បានផុស

១ year មុន

នៅ

ថ្ងៃព្រហស្បតិ៍ ៩ វិច្ឆិកា ២០២៣

ដោយ

អគ្គលេខាធិការអង្គការសហប្រជាជាតិ លោក Antonio Guterres បាននិយាយកាលពីថ្ងៃពុធទី៨ខែវិច្ឆិកាថា ចំនួនជនស៊ីវិលដែលត្រូវបានសម្លាប់នៅក្នុងតំបន់ហ្គាហ្សាស្រ្ទីប បង្ហាញថា ពិតជាមានអ្វីខុសហើយ ក្នុងប្រតិបត្តិការយោធារបស់អ៊ីស្រាអែល ប្រឆាំងក្រុមសកម្មប្រយុទ្ធប៉ាឡេស្ទីន ហាម៉ាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែល ប្តេជ្ញាថា នឹងលុបបំបាត់ក្រុមហាម៉ាស ដែលគ្រប់គ្រងតំបន់ហ្គាហ្សាស្ទ្រីប បន្ទាប់ពីចលនាសកម្មប្រយុទ្ធនេះ សម្លាប់មនុស្សប្រមាន១៤០០នាក់ និងចាប់ចំណាប់ខ្មាំងជាង២៤០នាក់ទៀត ក្នុងការវាយប្រហារថ្ងៃទី៧តុលា។ ជាការសងសឹក អ៊ីស្រាអែលបានវាយលុកតំបន់ហ្គាហ្សាវិញ ទាំងតាមអាកាសនិងជើងគោក។

លោក Guterres បានប្រាប់ Reuters NEXT ថា “ពិតជាមានការរំលោភបំពានដោយក្រុមហាម៉ាសមែន នៅពេលពួកគេយកមនុស្សធ្វើជាខែល ប៉ុន្តែនៅពេលពិនិត្យមើលតួលេខជនស៊ីវិលដែលត្រូវបានសម្លាប់ជាមួយនឹងប្រតិបត្តិការយោធានោះ វាពិតជាមានអ្វីខុសហើយ”។

តាមការបញ្ជាក់ពីមន្ត្រីប៉ាឡេស្ទីន, មនុស្សចំនួន ១០៥៦៩នាក់ ត្រូវបានសម្លាប់នៅហ្គាហ្សា ដោយក្នុងនោះមាន៤០%គឺជាកុមារ។

លោក Guterres និយាយថា “វាក៏មានសារៈសំខាន់ផងដែរ ក្នុងការធ្វើឲ្យអ៊ីស្រាអែលយល់ថា រូបភាពដ៏គួរឲ្យភ័យខ្លាចនៃតម្រូវការមនុស្សធម៌ដ៏ធំធេងរបស់ប្រជាជនប៉ាឡេស្ទីន គឺមិនជួយអ៊ីស្រាអែល ឲ្យរួចផុតពីមតិសាធារណៈជាសកលទេ។ យើងត្រូវបែងចែកថា ហាម៉ាស ជារឿងមួយ ប្រជាជនប៉ាឡេស្ទីន ជារឿងមួយ”។

លើសពីនេះ លោក Guterres បានប្រៀបធៀបចំនួនកុមារដែលត្រូវបានសម្លាប់នៅក្នុងតំបន់ ហ្គាហ្សា ទៅនឹងចំនួនអ្នកស្លាប់ក្នុងជម្លោះជុំវិញពិភពលោក ហើយកាលពីថ្ងៃចន្ទទី៦ខែវិច្ឆិកា លោកនិយាយថា ហ្គាហ្សាកំពុងក្លាយជាទីបញ្ចុះសពកុមារ៕

ប្រែសម្រួល៖ Vann Vann

ប្រភព៖ CNA

ចុចអាន៖ ក្បួនរថយន្តដឹកគ្រឿងវេជ្ជសាស្រ្ត ទៅដល់មន្ទីរពេទ្យធំ នៃតំបន់ហ្គាហ្សា