មេដឹកនាំអារ៉ាប់ និងមូស្លីម ទាមទារឲ្យ​​បញ្ចប់​សង្គ្រាម​ហ្គាហ្សា​ ជា​បន្ទាន់

អារ៉ាប៊ីសាអូឌីតនិងបណ្តាប្រទេសមូស្លីមផ្សេងទៀត បានអំពាវនាវឲ្យអ៊ីស្រាអែល បញ្ចប់ប្រតិបត្តិការយោធានៅតំបន់ហ្គាហ្សាជាបន្ទាន់ ហើយច្រានចោលការអះអាងរបស់អ៊ីស្រាអែល ដែលថាសកម្មភាពរបស់ខ្លួនប្រឆាំងនឹងប៉ាឡេស្ទីន គឺជាការការពារខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្តីថ្លែងការណ៍ចុងក្រោយ, កិច្ចប្រជុំកំពូលវិសាមញ្ញឥស្លាម-អារ៉ាប់ នៅទីក្រុង រីយ៉ាដ បានជំរុញឲ្យតុលាការឧក្រិដ្ឋកម្មអន្តរជាតិស៊ើបអង្កេត “ឧក្រិដ្ឋកម្មសង្គ្រាម និងឧក្រិដ្ឋកម្មប្រឆាំងមនុស្សជាតិ” ដែលអ៊ីស្រាអែលកំពុងប្រព្រឹត្តនៅក្នុងទឹកដីប៉ាឡេស្ទីន។

ប្រទេសអារ៉ាប៊ីសាអូឌីត បានព្យាយាមដាក់សម្ពាធលើសហរដ្ឋអាមេរិកនិងអ៊ីស្រាអែល ឲ្យបញ្ចប់អរិភាពនៅក្នុងតំបន់ហ្គាហ្សា ហើយព្រះអង្គម្ចាស់ Mohammed bin Salman បានខិតខំប្រមែប្រមូលមេដឹកនាំមូស្លីម ដើម្បីផ្សព្វផ្សាយសារនេះ។

កិច្ចប្រជុំនេះ មានការចូលរួមពីសំណាក់ មេដឹកនាំរាប់សិបអង្គ/នាក់ រួមទាំងប្រធានាធិបតីអ៊ីរ៉ង់ Ebrahim Raisi, ប្រធានាធិបតីតួកគី Tayyip Erdogan, ព្រះចៅអធិរាជកាតា Sheikh Tamim bin Hamad Al Thani និងប្រធានាធិបតីស៊ីរី Bashar al-Assad ផងដែរ។

ក្នុងអំឡុងពេលនោះ ប្រធានាធិបតីប៉ាឡេស្ទីនលោក Mahmoud Abbas និយាយថា ប្រជាជនប៉ាឡេស្ទីន កំពុងប្រឈមមុខនឹងសង្រ្គាមប្រល័យពូជសាសន៍ ហើយបានជំរុញឲ្យសហរដ្ឋអាមេរិកបញ្ចប់វាយលុករបស់អ៊ីស្រាអែល។

ភាពតានតឹងនៅតំបន់មជ្ឈិមបូព៌ា បានកើនឡើងខ្ពស់ ចាប់តាំងពីយុទ្ធជនក្រុមហាម៉ាស វាយលុកចូលអ៊ីស្រាអែលកាលពីថ្ងៃទី៧ខែតុលា ដោយសម្លាប់មនុស្ស១២០០នាក់។

ចាប់តាំងពីពេលនោះមក អ៊ីស្រាអែលបានបង្កើនការវាយប្រហារលើតំបន់ហ្គាហ្សា ដែលគិតត្រឹមពេលនេះ មនុស្ស១១០៧៨នាក់ ត្រូវបានសម្លាប់ ដោយក្នុងនោះមាន ៤០%ភាគរយជាកុមារ៕

ប្រែសម្រួល៖ Vann Vann

ប្រភព៖ Area News

ចុចអាន៖ ពលករថៃ ៥នាក់ទៀតស្លាប់នៅ អ៊ីស្រាអែល នាំឲ្យចំនួនសរុបកើនដល់ ៣៩នាក់