អាមេរិក បើកការវាយប្រហារសងសឹកលើទីតាំងអ៊ីរ៉ង់ នៅស៊ីរី

កាលពីថ្ងៃអាទិត្យទី១២ខែវិច្ឆិកា សហរដ្ឋអាមេរិកនិយាយថា ខ្លួនបានបើកការវាយប្រហារតាមអាកាសលើមូលដ្ឋានអ៊ីរ៉ង់ចំនួនពីរ នៅភាគអាគ្នេយ៍ប្រទេសស៊ីរី បន្ទាប់ពីបុគ្គលិកយោធារបស់ខ្លួននៅក្នុងប្រទេសស៊ីរី និងអ៊ីរ៉ាក់ ត្រូវរងការបាញ់មីស៊ីលនាពេលថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីរដ្ឋមន្ត្រីការពារជាតិអាមេរិក លោក Lloyd Austin, ការវាយប្រហារ ត្រូវបានធ្វើឡើងប្រឆាំងនឹងទីតាំងដែលប្រើប្រាស់ដោយកងឆ្មាំបដិវត្តន៍ឥស្លាម (IRGC) របស់អ៊ីរ៉ង់ និងក្រុមដែលមានទំនាក់ទំនងជាមួយទីក្រុងតេហេរ៉ង់។

នៅក្នុងសេចក្តីថ្លែងការណ៍មួយ លោកនិយាយថា “ការវាយប្រហារគឺប្រឆាំងនឹងទីតាំងហ្វឹកហ្វឺននៅជិតទីក្រុង Abu Kamal និងផ្ទះសុវត្ថិភាពមួយក្នុងទីក្រុង Mayadin។

លោកបន្តថា “គ្មានអ្វីជាអាទិភាពខ្ពស់ជាងសុវត្ថិភាពរបស់បុគ្គលិកអាមេរិកនោះទេ ហើយលោកប្រធានាធិបតីបានដឹកនាំសកម្មភាពនៅថ្ងៃនេះ ដើម្បីបញ្ជាក់ឲ្យច្បាស់ថា សហរដ្ឋអាមេរិកនឹងការពារខ្លួន យោធានិងផលប្រយោជន៍របស់ខ្លួន”។

គួររម្លឹកឡើងវិញ កាលពីថ្ងៃពុធសប្តាហ៍មុន សហរដ្ឋអាមេរិក ក៏បានចាប់ផ្តើមការវាយប្រហារស្វ័យការពារលើអ្វីដែលខ្លួននិយាយថា ជាឃ្លាំងអាវុធដែលប្រើប្រាស់ដោយ IRGC និងសាខារបស់ខ្លួននៅក្នុងតំបន់ Maysulun ភាគខាងកើតប្រទេសស៊ីរី ផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ កងកម្លាំងគាំទ្រដោយ អ៊ីរ៉ង់ បន្តការវាយប្រហារលើទាហាន អាមេរិក នៅស៊ីរី និងអ៊ីរ៉ាក់