តួលេខកុមារស្លាប់នៅហ្គាហ្សា កើនលើស ៤៦០០នាក់ ខណៈជាង៨៦០០នាក់ រងរបួស

ពេលនេះមានកុមារជាង ៤,៦០០ នាក់ហើយ ត្រូវបានរាយការណ៍ថាបាត់បង់ជីវិត និងជាង ៨,៦០០ នាក់រងរបួស ខណៈជាង ១,៥០០ នាក់ សន្មតថា បាត់ខ្លួន ដោយសារតែជាប់នៅក្រោមគំនរអគារបាក់បែកក្នុងតំបន់ហ្គាហ្សា ។ នេះបើតាមការបញ្ជាក់ពីការិយាល័យប្រចាំតំបន់មជ្ឈិមបូព៌ា និងអាហ្វ្រិកខាងជើងរបស់ UNICEF ប្រាប់ទៅ Sputnik ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម UNICEF, “លើសពីនេះ មនុស្សជាង ១.៥ លាននាក់ ដែលពាក់កណ្តាលជាកុមារ ត្រូវផ្លាស់ទីលំនៅ ហើយឥឡូវនេះ ពួកគេភាគច្រើន កំពុងរស់នៅក្នុងជម្រកដែលមានប្រជាជនច្រើន មិនសូវមានលទ្ធភាពទទួលបានទឹកស្អាត អាហារ និងអនាម័យនោះទេ ។ ទឹក​ស្អាត​នៅ​តំបន់ ហ្គាហ្សាស្រ្ទីបជិតអស់ហើយ ដែលជាហេតុ​បង្ក​គ្រោះថ្នាក់​ធ្ងន់ធ្ងរ​ជាពិសេស​ចំពោះ​កុមារតែម្ដង ។ ប្រជាជន ត្រូវបង្ខំចិត្តប្រើប្រាស់ទឹកកខ្វក់ពីអណ្តូង ទឹកប្រៃ និងប្រភពមិនមានសុវត្ថិភាពផ្សេងទៀត ដែលបង្កើនហានិភ័យនៃជំងឺរាគរូសធ្ងន់ធ្ងរ ជាពិសេសចំពោះកុមារអាយុក្រោម៥ឆ្នាំ”។

ទោះបីជាយ៉ាងណាក៏ដោយ UNICEF បញ្ជាក់ថា ខ្លួនកំពុងផ្តល់ជំនួយមនុស្សធម៌តាមច្រកព្រំដែន Rafah។ ជំនួយទាំងនោះរួមមាន ទឹក សម្ភារបន្សុទ្ធទឹក ឧបករណ៍សុខភាព ថ្នាំពេទ្យ ឧបករណ៍អនាម័យ និងជំនួយជាសាច់ប្រាក់មនុស្សធម៌។

មុននេះ ក្រសួងសុខាភិបាលប៉ាឡេស្ទីន និយាយថា ទារកទើបនឹងកើត និងអ្នកជំងឺផ្សេងទៀតនៅមន្ទីរពេទ្យធំបំផុតរបស់តំបន់ហ្គាហ្សា កំពុងស្លាប់ជាបន្តបន្ទាប់ ដោយសារលែងមានអគ្គិសនី រីឯធនធាននៅទីនោះ ក៏អស់ទៅទៀត។

មន្ទីរពេទ្យ Al-Shifa នៅទីក្រុងហ្គាហ្សា គឺលែងដំណើរការចាប់តាំងពីថ្ងៃសៅរ៍សប្តាហ៍មុនមកម្ល៉េះ ខណៈការទម្លាក់គ្រាប់បែក និងការប្រយុទ្ធគ្នាយ៉ាងខ្លាំងក្លានៅខាងក្រៅអគារ បានបណ្តាលឲ្យដាច់ចរន្តអគ្គិសនី ចំពេលមានកង្វះខាតប្រេងឥន្ធនៈ៕

ប្រែសម្រួល៖ Vann Vann

ប្រភព៖ NBC News, RT

ចុចអាន៖ ទារកទើបកើត និងអ្នកជំងឺនៅមន្ទីរពេទ្យធំបំផុតក្នុងតំបន់ហ្គាហ្សា កំពុងស្លាប់ជាបន្តបន្ទាប់