ព័ត៌មានអន្ដរជាតិ

លោក ស៊ី ជីនពីង អញ្ជើញទៅដល់ទឹកដី អាមេរិក ហើយ និងត្រៀមជួបពិភាក្សាជាមួយលោក បៃដិន

បានផុស

១ year មុន

នៅ

ថ្ងៃពុធ ១៥ វិច្ឆិកា ២០២៣

ដោយ

យោងតាមសារព័ត៌មាន NBC Bay Area បានរាយការណ៍កាលពីថ្ងៃអង្គារថា ប្រធានាធិបតីចិនលោក ស៊ី ជីនពីង បានអញ្ជើញទៅដល់ទីក្រុង San Francisco ហើយដើម្បីចូលរួមក្នុងកិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) ហើយក៏ត្រៀមនឹងជួបជាមួយប្រធានាធិបតីសហរដ្ឋអាមេរិកលោក ចូ បៃដិន ផងដែរ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មានខាងលើបានរាយការណ៍ទៀតថា លោក ស៊ី បានអញ្ជើញទៅដល់ទឹកដីនៃសហរដ្ឋអាមេរិកកាលពីរសៀលថ្ងៃអង្គារ ខណៈកិច្ចប្រជុំជាមួយលោក បៃដិន គ្រោងនឹងរៀបចំឡើងនៅថ្ងៃពុធនេះ ប្រសិនបើមេដឹកនាំទាំងពីរអាចបន្តការទំនាក់ទំនងធម្មតាឡើងវិញ រួមទាំងបញ្ហាយោធាផងដែរ ។

ពាក់ព័ន្ធនឹងបញ្ហានេះដែរ ទីប្រឹក្សាសន្តិសុខជាតិអាមេរិក លោក Jake Sullivan បាននិយាយកាលពីថ្ងៃចន្ទថា លោក បៃដិន ក៏រំពឹងនឹងពិភាក្សាអំពីជម្លោះ ប៉ាឡេស្ទីន-អ៊ីស្រាអែល និងរុស្ស៊ី-អ៊ុយក្រែន ក្នុងអំឡុងកិច្ចប្រជុំជាមួយលោក ស៊ី ផងដែរ ។

ទីប្រឹក្សាសន្តិសុខជាតិអាមេរិករូបនេះបានបន្ថែមថា ក្នុងជំនួបនោះដែរ លោក បៃដិន ក៏នឹងលើកឡើងពីបញ្ហានៃការគំរាមកំហែងដែលបង្កឡើងដោយអ៊ីរ៉ង់ រួមទាំងកម្មវិធីនុយក្លេអ៊ែរ និងសកម្មភាពរបស់ខ្លួនដែលគំរាមកំហែងដល់ស្ថិរភាពនៅមជ្ឈិមបូព៌ា ។

គួរបញ្ជាក់ថា កិច្ចប្រជុំកំពូលនៃកិច្ចសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) គឺជាវេទិកាពាណិជ្ជកម្ម និងសេដ្ឋកិច្ចរបស់ប្រទេសចំនួន ២១ ក្នុងតំបន់អាស៊ីប៉ាស៊ីហ្វិក ខណៈកិច្ចប្រជុំកំពូលឆ្នាំនេះដែលរៀបចំឡើងក្នុងទឹកដីនៃទីក្រុង San Francisco នឹងប្រព្រឹត្តទៅចាប់ពីថ្ងៃទី១១ ដល់ថ្ងៃទី១៧ ខែវិច្ឆិកា ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ បញ្ហាធំមួយ នឹងត្រូវលើកយកមកពិភាក្សា ក្នុងជំនួបកំពូល បៃដិន-ស៊ី