តើលោក ចូ បៃដិន និង ស៊ី ជីនពីង ពិភាក្សាគ្នាលើបញ្ហាអ្វីខ្លះ ក្នុងជំនួបកំពូលនៅ កាលីហ្វ័រញ៉ា?

ប្រធានាធិបតីអាមេរិកលោក ចូ បៃដិន បានជួបជាមួយប្រធានាធិបតីចិន ស៊ី ជីនពីង នៅក្រៅកិច្ចប្រជុំកំពូលសេដ្ឋកិច្ច (APEC) ក្នុងរដ្ឋកាលីហ្វ័រញ៉ា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កិច្ចប្រជុំនេះ ធ្វើឡើងកាលពីថ្ងៃពុធទី១៥ខែវិច្ឆិកា ហើយកើតឡើងចំពេលមានភាពតានតឹងកាន់តែខ្លាំងរវាងទីក្រុងវ៉ាស៊ីនតោន និងទីក្រុងប៉េកាំង។

ក្នុងជំនួបនោះ លោក បៃដិន និយាយថា ប្រទេសទាំងពីរ គួរតែខិតខំធ្វើឲ្យប្រាកដថា ពួកគេមិន មានជម្លោះ និងត្រូវគ្រប់គ្រងទំនាក់ទំនង ប្រកបដោយទំនួលខុសត្រូវ។

ជាការឆ្លើយតប​ លោក ស៊ី បានហៅទំនាក់ទំនងអាមេរិក-ចិន ថាជាទំនាក់ទំនងទ្វេភាគីដ៏សំខាន់បំផុតនៅក្នុងពិភពលោក ហើយនិយាយថា លោកនិងលោក បៃដិន ជាអ្នកផ្តល់ការទទួលខុសត្រូវដ៏ធំ សម្រាប់ប្រជាជនទាំងពីរ សម្រាប់ពិភពលោក និងសម្រាប់ប្រវត្តិសាស្រ្ត។

ក្នុងចំណោមប្រធានបទដែលមេដឹកនាំទាំងពីរលើកយកមកពិភាក្សាគ្នា រួមមានបញ្ហាកោះតៃវ៉ាន់ សមុទ្រចិនខាងត្បូង សង្គ្រាមអ៊ីស្រាអែលនិងក្រុមហាម៉ាស ការលុកលុយរបស់រុស្ស៊ីលើអ៊ុយក្រែន បញ្ហាកូរ៉េខាងជើង សារធាតុញៀន fentanyl និងសិទ្ធិមនុស្ស។

មិនត្រឹមប៉ុណ្ណឹង ក្រុមមន្ត្រីបាននិយាយថា ប្រធានបទសំខាន់ផ្សេងទៀតក្នុងជំនួបនេះបញ្ហាទំនាក់ទំនងយោធា ហើយជាលទ្ធផល ប្រទេសទាំងពីរ បានឯកភាពគ្នាស្តារទំនាក់ទំនងរវាងយោធានិងយោធាឡើងវិញ។

ក្រៅពីនេះ លោក បៃដិន ក៏ដាក់សម្ពាធប្រទេសចិនឲ្យប្រើឥទ្ធិពលរបស់ខ្លួន ដើម្បីបញ្ចុះបញ្ចូលអ៊ីរ៉ង់ ឲ្យបញ្ឈប់តំណាងរបស់ខ្លួនពីការវាយប្រហារលើកងកម្លាំងអាមេរិកនៅមជ្ឈិមបូព៌ា និងបញ្ឆេះជម្លោះរវាងអ៊ីស្រាអែល និងក្រុមហាម៉ាស ឲ្យកាន់តែក្តៅផងដែរ។

លោក បៃដិន ថែមទាំង​អំពាវនាវ​ដល់​ចិន ​កុំ​ឲ្យ​ផ្គត់ផ្គង់​សព្វាវុធ​ដល់​រុស្ស៊ី ដើម្បី​ជួយ​ក្នុង​ការ​លុកលុយ​អ៊ុយក្រែន និង​ដាក់​សម្ពាធ​លើ​កូរ៉េខាងជើង​កុំ​ឲ្យ​ធ្វើ​ដូច្នេះទៀតផង៕

ប្រែសម្រួល៖ Vann Vann

ប្រភព៖ Aljazeera, ABC

ចុចអាន៖ បញ្ហាធំមួយ នឹងត្រូវលើកយកមកពិភាក្សា ក្នុងជំនួបកំពូល បៃដិន-ស៊ី