លោក Netanyahu ឆ្លើយតបផាងៗ ក្រោយតួកគី ហៅ អ៊ីស្រាអែល ថាជា “រដ្ឋភេរវកម្ម”

នាយករដ្ឋមន្ត្រីអ៊ីស្រាអែលលោក Benjamin Netanyahu កាលពីថ្ងៃពុធទី១៥ខែវិច្ឆិកា បានច្រានចោលការរិះគន់ពីសំណាក់ប្រធានាធិបតីតួកគី Recep Tayyip Erdogan ដោយឆ្លើយតបផាងៗថា ប្រទេសតួកគីទៅវិញទេដែលជាអ្នកឧបត្ថម្ភភេរវកម្មយ៉ាងពិតប្រាកដ ហើយគ្មានសិទ្ធិបង្រៀននរណាម្នាក់ឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Netanyahu ​និយាយ​ក្នុង​សេចក្តីថ្លែងការណ៍​មួយថា “​លោក Erdogan បាន​ហៅ​អ៊ីស្រាអែល​ថា​ជា​រដ្ឋ​ភេរវកម្ម ប៉ុន្តែ​តាមពិត គាត់ទៅវិញទេ ដែល​គាំទ្រ​រដ្ឋ​ភេរវជន​​ហាម៉ាស។ គាត់​ផ្ទាល់ ជាអ្នក​ទម្លាក់​គ្រាប់បែក​លើ​ភូមិតួកគី ​ក្នុង​ព្រំដែនខ្លួនឯង យើង​នឹង​មិន​ទទួល​យក​ការ​អធិប្បាយ​របស់​គាត់​ឡើយ”។

ទីក្រុងអង់ការ៉ា បានធ្វើសង្រ្គាមលើក្រុមផ្តាច់ខ្លួនឃើដ ទាំងក្នុងទឹកដីតួកគី និងនៅក្រៅប្រទេសអស់រយៈពេលជាច្រើនឆ្នាំមកហើយ។ កាលពីខែមុន តួកគី ក៏បានបើកការវាយប្រហារតាមអាកាសជាបន្តបន្ទាប់ ប្រឆាំងនឹងជនជាតិឃើដនៅក្នុងប្រទេសស៊ីរី និងអ៊ីរ៉ាក់ ផងដែរ។

កាលពីព្រឹកថ្ងៃពុធទី១៥ខែវិច្ឆិកា នៅក្នុងសុន្ទរកថាទៅកាន់គណបក្សយុត្តិធម៌និងអភិវឌ្ឍន៍ (AKP) លោក Erdogan បានចោទប្រកាន់អ៊ីស្រាអែលថាជា រដ្ឋភេរវកម្ម ដោយសារតែទង្វើរបស់ខ្លួនចំពោះប៉ាឡេស្ទីននៅតំបន់ហ្គាហ្សា។

មេដឹកនាំតួកគីនិយាយថា “អ៊ីស្រាអែល បានប្រកាន់ខ្ជាប់នូវយុទ្ធសាស្ត្រនៃការបំផ្លិចបំផ្លាញទាំងស្រុងលើទីក្រុង និងប្រជាជនរបស់ខ្លួន។ ពួកគេ​កំពុង​ប្រព្រឹត្តអំពើភេរវកម្ម​​យ៉ាង​ព្រៃផ្សៃ និងមានចេតនា​ទម្លាក់​គ្រាប់បែក​លើ​ជន​ស៊ីវិល​ដែលកំពុង​រត់គេចខ្លួន។ ខ្ញុំសូមនិយាយដោយបើកចំហ ដោយចេញពីបេះដូងថា អ៊ីស្រាអែល គឺជារដ្ឋភេរវកម្ម”។

លើសពីនេះ លោក Erdogan អះអាងថា អ៊ីស្រាអែល បាននិងកំពុងប្រព្រឹត្តឧក្រិដ្ឋកម្មសង្គ្រាមជាបន្តបន្ទាប់សម្រាប់រយៈពេល៤០ថ្ងៃចុងក្រោយ ជាមួយចេតនាកំណត់គោលដៅលើមន្ទីរពេទ្យ ផ្លូវ និងវិហារឥស្លាមនៅក្នុងតំបន់ហ្គាហ្សា ជាមួយការគាំទ្រពេញលេញពីសហរដ្ឋអាមេរិក និងលោកខាងលិច។

លោកក៏បានចោទប្រកាន់លោក Netanyahu ពីបទធ្វើការវាយប្រហារឃោរឃៅបំផុត ប្រឆាំងនឹងស្ត្រី និងកុមារក្នុងប្រវត្តិសាស្ត្រ និងគំរាមកំហែងមនុស្សដោយអាវុធនុយក្លេអ៊ែរផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ លោក Netanyahu ព្រមានថា អាមេរិក នឹងក្លាយជាគោលដៅបន្ទាប់ បើអ៊ីស្រាអែល ចាញ់សង្គ្រាម