កងទ័ពអ៊ីស្រាអែល អះអាងរកឃើញផ្លូវក្រោមដី ជាកន្លែងលាក់ខ្លួនរបស់ក្រុមហាម៉ាស

កងទ័ព​អ៊ីស្រាអែល ​និយាយ​កាលពីថ្ងៃព្រហស្បតិ៍ទី១៦ខែវិច្ឆិកាថា ពួកគេ​បាន​រក​ឃើញ​ផ្លូវ​រូង​ក្រោម​ដីដែលជាកន្លែងលាក់ខ្លួនរបស់ក្រុមហាម៉ាស និងអាវុធ​ក្នុង​បរិវេណ​មន្ទីរពេទ្យ al Shifa។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីស្រាអែល ក៏អះអាងផងដែរថា កងកម្លាំងបានរកឃើញរថយន្តដែលក្រុមហាម៉ាស ប្រើសម្រាប់ការវាយប្រហារកាលពីថ្ងៃទី៧ខែតុលា នៅភាគខាងត្បូងប្រទេសអ៊ីស្រាអែល ហើយក្នុងរថយន្ត​នោះ ​មានផ្ទុក​អាវុធថែមទៀតផង។

រឿងនេះកើតឡើង បន្ទាប់ពី IDF បានបញ្ចេញវីដេអូមួយកាលពីថ្ងៃពុធ បង្ហាញពីសម្ភារដែលបានរកឃើញពីអគារនៅក្នុងមន្ទីរពេទ្យ រួមមានអាវុធស្វ័យប្រវត្តិ គ្រាប់បែកដៃ គ្រាប់រំសេវ និងអាវធំ។

កាលពីប៉ុន្មានថ្ងៃមុន យោធា​អ៊ីស្រាអែល​បាន​ឆ្មក់​ចូល​អគារ​សំខាន់ៗ​របស់​មន្ទីរពេទ្យ al-Shifa ដូចជាបន្ទប់​សង្គ្រោះ​បន្ទាន់ បន្ទប់​វះកាត់​ឯកទេស និង​មន្ទីរ​សម្ភព​ផង​ដែរ ដោយ​ធ្វើ​ប្រតិបត្តិការឆែកឆេរ​តាម​បន្ទប់ ពីច្រកមួយទៅច្រកមួយ និងសួរចម្លើយ​វេជ្ជបណ្ឌិត ក៏ដូចជា​បុគ្គលិក​ពេទ្យ​ម្នាក់ម្តងៗទៀតផង។

យោធាអ៊ីស្រាអែលអះអាងថា មន្ទីរពេទ្យខាងលើ កំពុងត្រូវបានប្រើប្រាស់ដោយថ្នាក់ដឹកនាំ ឬសមាជិករបស់ក្រុមហាម៉ាស ដើម្បីអនុវត្តប្រតិបត្តិការរបស់ពួកគេ ប៉ុន្តែត្រូវក្រុមហាម៉ាស បដិសេធ។

មិនត្រឹមប៉ុណ្ណឹង កងទ័ពអ៊ីស្រាអែល បានបង្កើតប៉ុស្តិ៍ត្រួតពិនិត្យអេឡិចត្រូនិច នៅតាមច្រកទ្វារជាច្រើននៃអគារសំខាន់ៗរបស់មន្ទីរពេទ្យ ហើយពួកគេហៅមនុស្សនៅខាងក្នុង មិនថាជាក្រុមគ្រូពេទ្យ អ្នកជំងឺ ឬអ្នករបួសទេ, ពួកគេត្រូវតែឆ្លងកាត់ច្រកអេឡិចត្រូនិចទាំងនេះសិន ដើម្បីសួរចម្លើយដោយយោធាអ៊ីស្រាអែល៕

ប្រែសម្រួល៖ Vann Vann

ប្រភព៖ Sky

ចុចអាន៖ Aljazeera៖ កងទ័ពអ៊ីស្រាអែល សួរចម្លើយគ្រូពេទ្យ និងអ្នកជំងឺ ម្នាក់ម្តងៗ នៅហ្គាហ្សា