អាមេរិក-ហ្វីលីពីន ចុះកិច្ចព្រមព្រៀងនុយក្លេអ៊ែរ

សហរដ្ឋអាមេរិក និងហ្វីលីពីន នៅថ្ងៃសុក្រ ទី១៧ វិច្ឆិកា ឆ្នាំ២០២៣ បានចុះហត្ថលេខាលើកិច្ចព្រមព្រៀងដ៏សំខាន់មួយ ដែលនឹងអនុញ្ញាតឱ្យទីក្រុងវ៉ាស៊ីនតោន នាំចេញបច្ចេកវិទ្យានុយក្លេអ៊ែរ និងសម្ភារៈទៅកាន់ទីក្រុងម៉ានីល ដែលកំពុងស្វែងរកការប្រើប្រាស់ថាមពលនុយក្លេអ៊ែរនៅក្នុងប្រទេស។

រដ្ឋមន្ត្រីការបរទេសអាមេរិក លោក Antony Blinken បាននិយាយនៅក្នុងពិធីចុះហត្ថលេខាមួយនៅខាងក្រៅកិច្ចប្រជុំកំពូល Apec នៅរដ្ឋសាន់ហ្វ្រង់ស៊ីស្កូ ថា “សហរដ្ឋអាមេរិកនឹងចែករំលែកឧបករណ៍ និងសម្ភារៈជាមួយហ្វីលីពីន នៅពេលដែលពួកគេធ្វើការបង្កើតរ៉េអាក់ទ័រម៉ូឌុលខ្នាតតូច និងហេដ្ឋារចនាសម្ព័ន្ធថាមពលនុយក្លេអ៊ែរស៊ីវិលដទៃទៀត” ។

ប្រធានាធិបតីហ្វីលីពីនលោក Ferdinand Marcos Jr បាននិយាយនៅក្នុងសុន្ទរកថាមួយថា “យើងមើលឃើញថាថាមពលនុយក្លេអ៊ែរក្លាយជាផ្នែកដ៏សំខាន់នៃថាមពលរបស់ប្រទេសហ្វីលីពីននៅឆ្នាំ២០៣២ ហើយយើងពិតជារីករាយក្នុងការបន្តផ្លូវនេះជាមួយសហរដ្ឋអាមេរិក។ ថាមពលនុយក្លេអ៊ែរគឺចំណុចមួយដែលយើងអាចបង្ហាញពីភាពជាដៃគូរបស់ហ្វីលីពីន-អាមេរិក” ។

ការចុះកិច្ចព្រមព្រៀងនេះ ដោយសារហ្វីលីពីនចង់ទាញយកថាមពលនុយក្លេអ៊ែរជាប្រភពថាមពលជំនួសដែលអាចផ្ទុកថាមពលបានដើម្បីជួយបំពេញគោលដៅអាកាសធាតុ និងជំរុញសន្តិសុខថាមពល ខណៈរោងចក្រធ្យូងថ្មរបស់ខ្លួនជិតនឹងត្រូវបិទ។ ហ្វីលីពីនជាប្រទេសងាយរងគ្រោះដោយសារតម្លៃប្រេងពិភពលោកដែលប្រែប្រួល ការដាច់ចរន្តអគ្គិសនីតាមរដូវកាល និងអត្រាអគ្គិសនីខ្ពស់ ដូច្នេះកិច្ចព្រមព្រៀងនុយក្លេអ៊ែរអាចជួយប្រទេសនេះយ៉ាងច្រើនលើសលប់៕

ប្រែសម្រួល៖ សន្យា

ប្រភព៖ Reuters

ចុចអាន៖