ស្លាប់មនុស្ស ៣២នាក់ ក្រោយអ៊ីស្រាអែលវាយប្រហារតាមអាកាសលើលំនៅដ្ឋានភាគខាងត្បូងហ្គាហ្សា

ការវាយប្រហារតាមអាកាសរបស់អ៊ីស្រាអែលទៅលើប្លុកលំនៅដ្ឋាននៅភាគខាងត្បូងតំបន់ហ្គាហ្សាបានសម្លាប់ជនជាតិប៉ាឡេស្ទីនយ៉ាងហោចណាស់ ៣២នាក់ នៅថ្ងៃសៅរ៍នេះ បន្ទាប់ពីអ៊ីស្រាអែលធ្វើការព្រមានម្តងទៀតដល់ជនស៊ីវិលឱ្យផ្លាស់ប្តូរទីលំនៅ។

ចំណាត់ការបែបនេះអាចបង្ខំប្រជាជនប៉ាឡេស្ទីនរាប់សែននាក់ដែលបានភៀសខ្លួនចេញពីភាគខាងត្បូងពីការវាយលុករបស់អ៊ីស្រាអែលលើទីក្រុងហ្គាហ្សាឱ្យផ្លាស់ទីម្តងទៀត រួមជាមួយនឹងអ្នកស្រុក Khan Younis ជាង ៤០០,០០០នាក់ ដែលកំពុងធ្វើឱ្យវិបត្តិមនុស្សធម៌កាន់តែធ្ងន់ធ្ងរឡើងៗ។

លោក Mark Regev ជំនួយការរបស់នាយករដ្ឋមន្ត្រីអ៊ីស្រាអែល លោក Benjamin Netanyahu បានប្រាប់ MSNBC កាលពីនៅថ្ងៃសុក្រថា “យើងកំពុងស្នើសុំឱ្យមនុស្សផ្លាស់ប្តូរទីលំនៅ។ ខ្ញុំដឹងថាវាមិនងាយស្រួលសម្រាប់ពួកគេទេ ប៉ុន្តែយើងមិនចង់ឃើញជនស៊ីវិលជាប់នៅក្នុងភ្លើងឆេះឡើយ” ។

អាជ្ញាធរសុខាភិបាលហ្គាហ្សាបានឱ្យដឹងថា ពេញមួយយប់ថ្ងៃសៅរ៍ ជនជាតិប៉ាឡេស្ទីន  ២៦នាក់បានស្លាប់ និង ២៣នាក់បានរងរបួសដោយការវាយប្រហារតាមអាកាសលើផ្ទះល្វែងចំនួន ២ខ្នង នៅក្នុងប្លុកនៃសង្កាត់លំនៅដ្ឋាន Khan Younis។ ប៉ុន្មានគីឡូម៉ែត្រទៅភាគខាងជើងនៃប្លុកនេះ ជនជាតិប៉ាឡេស្ទីន ៦នាក់ត្រូវបានសម្លាប់ដោយសារគ្រាប់បែកពីលើអាកាសធ្លាក់ទៅលើផ្ទះ។

មិនមានការអត្ថាធិប្បាយពីយោធាអ៊ីស្រាអែលថាក្រុមសកម្មប្រយុទ្ធហាម៉ាសប្រើប្រាស់អគារលំនៅដ្ឋាន និងសង្កាត់នានាក្នុង តំបន់ហ្គាហ្សាភាគខាងត្បូងជាមូលដ្ឋានឡើយ។ យ៉ាងណាមិញ មុនការវាយលុក អ៊ីស្រាអែលបានទម្លាក់ខិត្តប័ណ្ណពីលើតំបន់ Khan Younis ប្រាប់អ្នកស្រុកឱ្យជម្លៀសទៅកាន់ទីជម្រក ដោយបញ្ជាក់ថា ប្រតិបត្តិការយោធានៅទីនោះជិតទៅដល់ហើយ៕

ប្រែសម្រួល៖ សន្យា

ប្រភព៖ Reuters

ចុចអាន៖ អ៊ីស្រាអែល យល់ព្រមឲ្យរថយន្តដឹកប្រេងឥន្ធនៈចូលតំបន់ហ្គាហ្សា ២គ្រឿងក្នុងមួយថ្ងៃ