ក្រោយ ថៃ ជួបគ្រោះរញ្ជួយដី ប្រជាជន បារម្ភខ្លាចបាក់ទំនប់ទឹក

ស្របពេលប្រជាជនបង្ហាញក្តីបារម្ភ អាជ្ញាធរថៃ បានចេញមកបញ្ជាក់ថា ការរញ្ជួយដីកម្រិត ៤.០រ៉ិចទ័រ ជម្រៅ៦គីឡូម៉ែត្រ កាលពីថ្ងៃអាទិត្យទី១៩ខែវិច្ឆិកា គឺមិនប៉ះពាល់ដល់ទំនប់ Vajiralongkorn ក្នុងស្រុក Thong Pha Phum និងទំនប់ Sri Nakharin ក្នុងស្រុក Si Sawat នៃខេត្ត Kanchanaburi នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីថ្លែងការណ៍, ចំណុចកណ្តាលនៃការរញ្ជួយដី ដែលស្ថិតនៅតំបន់ Nong Lu នៃស្រុក Sangkhlaburi ក្នុងខេត្ត Kanchanaburi គឺនៅឆ្ងាយពីទំនប់ទាំងពីរនេះណាស់ ហេតុដូច្នេះហើយមិនមានកម្លាំងរញ្ជួយណាមួយ ធ្វើឲ្យប៉ះពាល់ដល់ទំនប់ទេ។

សេចក្តីថ្លែងការណ៍បន្តថា មិនមានអ្វីត្រូវបារម្ភឡើយ ព្រោះនេះគឺជារញ្ជួយដី ដែលកើតឡើងត្រឹមតែរយៈពេលខ្លី ពោលគឺប្រហែល១០វិនាទីប៉ុណ្ណោះ។

នៅឯស្ពាន Mon ក្នុងតំបន់ Nong Lu, ភ្ញៀវទេសចរនៅតែបន្តទៅទស្សនាតំបន់នេះ ដើម្បីថតរូប និងចូលរួមសកម្មភាពនានា បើទោះបីជាមានការរញ្ជួយដីថ្មីៗក៏ដោយ ខណៈក៏មិនទាន់មានសេចក្តីរាយការណ៍ អំពីការខូចខាតនៅតំបន់ជុំវិញស្ពាននេះដែរ។

គួរបញ្ជាក់ថា គ្រោះរញ្ជួយដីធំចុងក្រោយក្នុងស្រុក Sangkhlaburi គឺបានកើតឡើងនៅថ្ងៃទី១៤ខែកក្កដាឆ្នាំ២០១៥ ដោយមានកម្រិត ៤.៨រ៉ិចទ័រ ជាមួយជម្រៅប្រហែល៤គីឡូម៉ែត្រ៕

ប្រែសម្រួល៖ Vann Vann

ប្រភព៖ Nation, Facebook

ចុចអាន៖ ទីក្រុងហាណូយ និងបាងកក សុទ្ធតែរង្គើ ដោយការរញ្ជួយដី