អ៊ីស្រាអែល​ ​ថា ​ទាហានត្រូវក្រុមហាម៉ាស ប្រហារ​ជីវិត ហើយ​ចំណាប់​ខ្មាំង​បរទេស កំពុងឃុំឃាំង​ក្នុង​មន្ទីរពេទ្យនៅ ហ្គាហ្សា

កាលពីថ្ងៃអាទិត្យទី១៩ខែវិច្ឆិកា អ៊ីស្រាអែល បានបន្តចោទប្រកាន់លើក្រុមហាម៉ាសនៅមន្ទីរពេទ្យធំបំផុតរបស់តំបន់ហ្គាហ្សាស្ទ្រីប ដោយនិយាយថា ទាហានជាឈ្លើយសឹកម្នាក់ត្រូវបានប្រហារជីវិត ហើយចំណាប់ខ្មាំងបរទេសពីរនាក់ កំពុងឃុំឃាំងនៅកន្លែងមួយ ដែលខ្លួនបានកំណត់គោលដៅក្នុងការវាយលុករយៈពេលប្រាំមួយសប្តាហ៍មកនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ធ្លាប់តែជាទីជម្រកសម្រាប់ជនភៀសខ្លួនសង្រ្គាមប៉ាឡេស្ទីនរាប់ម៉ឺននាក់, មន្ទីរពេទ្យ Al Shifa បាននិងកំពុងជម្លៀសអ្នកជំងឺ និងបុគ្គលិកចេញ ចាប់តាំងពីកងទ័ពអ៊ីស្រាអែល បើកវាយលុកកាលពីសប្តាហ៍មុនក្នុងអ្វីដែលពួកគេហៅថា ជាបេសកកម្មដើម្បីកម្ចាត់កន្លែងលាក់ខ្លួនរបស់ក្រុមហាម៉ាស។

អ៊ីស្រាអែល ក៏កំពុងស្វែងរកមនុស្សប្រហែល២៤០នាក់ ដែលក្រុមហាម៉ាសចាប់ពង្រត់ទៅកាន់តំបន់ហ្គាហ្សាផងដែរ បន្ទាប់ពីការវាយលុកឆ្លងព្រំដែនកាលពីថ្ងៃទី៧ខែតុលា ជាហេតុបង្កឲ្យមានសង្គ្រាម។

ម្នាក់​ក្នុង​ចំណោម​នោះ គឺ​ជា​ទាហានស្រី​អ៊ីស្រាអែល​អាយុ១៩ឆ្នាំ​ឈ្មោះ Noa Marciano ដែល​សាកសព​ត្រូវ​បាន​រក​ឃើញ​នៅ​ជិតមន្ទីរពេទ្យ Shifa កាល​ពី​សប្តាហ៍​មុន ប៉ុន្តែក្រុមហាម៉ាសអះអាងថា នាងស្លាប់ដោយសារការវាយប្រហារតាមអាកាសរបស់អ៊ីស្រាអែល។

អ្នកនាំពាក្យយោធាអ៊ីស្រាអែល លោក Daniel Hagari និយាយថា “យោងតាមព័ត៌មានចារកម្ម, Noa ត្រូវបានក្រុមភេរវករ ហាម៉ាស ចាប់យកទៅខាងក្នុងមន្ទីរពេទ្យ Shifa ដោយនៅទីនោះ នាងត្រូវបានចលនានេះសម្លាប់”។ យ៉ាងណាក្តី លោក​មិន​បាន​បញ្ជាក់​លម្អិត​ទេ។

ក្នុងបទសម្ភាសតាមទូរទស្សន៍ លោក Hagari បញ្ជាក់ថា ខ្មាន់កាំភ្លើងក្រុម ហាម៉ាស ក៏បាននាំជនជាតិនេប៉ាល់ម្នាក់ និងជនជាតិថៃម្នាក់ ទៅមន្ទីរពេទ្យ Shifa ផងដែរ។

ទោះបីជាយ៉ាងណាក៏ដោយ ក្រុម ហាម៉ាស មិន​បាន​ធ្វើ​អត្ថាធិប្បាយ​ភ្លាមៗ​លើ​សេចក្តី​ថ្លែងការណ៍​របស់​លោក Hagari ទេ ប៉ុន្តែមុននេះ ក្រុមសកម្មប្រយុទ្ធប៉ាឡេស្ទីន និយាយថា ខ្លួនបានចាប់ចំណាប់ខ្មាំងមួយចំនួនទៅកាន់មន្ទីរពេទ្យដើម្បីព្យាបាលប៉ុណ្ណោះ៕

ប្រែសម្រួល៖ Vann Vann

ប្រភព៖ CNA

ចុចអាន៖ ក្រុមហាម៉ាស ថា ការទម្លាក់គ្រាប់បែករបស់ អ៊ីស្រាអែល នៅតំបន់ហ្គាហ្សា សម្លាប់តែជនស៊ីវិលប៉ុណ្ណោះ