អ៊ីស្រាអែល ទម្លាយពីកម្លាំងសរុបរបស់ក្រុមហាម៉ាសដែលហ៊ានបើកការវាយ​ប្រហារកាលពីថ្ងៃទី៧ ខែតុលា

កងកម្លាំងការពារជាតិអ៊ីស្រាអែល (IDF) កាលពីពេលថ្មីៗនេះបានចេញការប៉ាន់ប្រមាណអំពីចំនួនកម្លាំងរបស់ក្រុមប្រដាប់អាវុធប៉ាឡេស្ទីនហាម៉ាសដែលហ៊ានបើកការវាយប្រហារចូលជ្រៅទៅក្នុងទឹកដីនៃប្រទេសអ៊ីស្រាអែលកាលពីថ្ងៃទី៧ ខែតុលា ។

យោងតាមការវាយតម្លៃរបស់កងកម្លាំងការពារជាតិអ៊ីស្រាអែល (IDF) ផ្អែកលើព័ត៌មានដែលទទួលបានពីការសាកសួរចម្លើយលើក្រុមហាម៉ាសបានឲ្យដឹងថា យុទ្ធជនរបស់ក្រុមប្រដាប់អាវុធមួយនេះបាននាំកម្លាំងប្រហែល ៣,០០០ នាក់ អំឡុងការវាយឆ្មក់ចូលក្នុងទឹកដីអ៊ីស្រាអែលនៅព្រឹកព្រលឹមកាលពីជាងមួយខែមុន ។

យោធាបញ្ជាក់ទៀតថា ក្រុមហាម៉ាសដែលបានលើកទ័ពប្រយុទ្ធ ៣,០០០ នាក់ក្នុងការប្រយុទ្ធ ក៏ដូចជាការវាយប្រហារឆ្លងព្រំដែនចូលប្រទេសអ៊ីស្រាអែល ក៏បានសម្លាប់មនុស្សប្រមាណ ១,២០០ នាក់ ដែលភាគច្រើនជាជនស៊ីវិលកំពុងស្នាក់នៅក្នុងផ្ទះរបស់ពួកគេ និងអ្នកចូលរួមនៅក្នុងពិធីបុណ្យតន្ត្រីមួយកន្លែង ខណៈពួកសកម្មប្រយុទ្ធក៏បានចាប់ចំណាប់ខ្មាំងយ៉ាងតិច ២៤០ នាក់ផងដែរ ។

ចាប់តាំងពីពេលនោះមក កងកម្លាំងការពារជាតិអ៊ីស្រាអែលបានបើកការវាយបកទ្រង់ទ្រាយធំនៅតំបន់ហ្គាហ្សា និងបានសម្លាប់ពួកសកម្មប្រយុទ្ធរបស់ក្រុមហាម៉ាសប្រមាណ ១,០០០ នាក់ផងដែរ និងចាប់ខ្លួនបានប្រហែល ២០០ នាក់ក្នុងរយៈពេល ២ ថ្ងៃដំបូងនៃប្រតិបត្តិការមិនធ្លាប់មានពីមុនមកមួយនេះ ។

រហូតមកដល់ពេលនេះ អ៊ីស្រាអែលនៅតែបន្តធ្វើការវាយប្រហារទាំងតាមផ្លូវអាកាស និងផ្លូវគោកដោយមិនប្រណីដៃលើតំបន់ហ្គាហ្សាស្ទ្រីប រួមទាំងមន្ទីរពេទ្យ កន្លែងស្នាក់នៅ និងវិហារឥស្លាមផងដែរ ខណៈយោងតាមក្រសួងសុខាភិបាលនៅតំបន់ហ្គាហ្សាបានឲ្យដឹងថា ជនស៊ីវិលលើស ១៣,៣០០ នាក់ រួមទាំងកុមារ និងស្ត្រីសរុប ៩,១៥០ នាក់ត្រូវបានសម្លាប់ ។

ក្រៅ​ពី​ចំនួន​អ្នក​ស្លាប់ដ៏ច្រើនសន្ធឹកសន្ធាប់នេះ ក្រសួងសុខាភិបាលដែលគ្រប់គ្រងដោយក្រុមហាម៉ាសបាននិយាយថា ការវាយប្រហារសងសឹករបស់អ៊ីស្រាអែលលើតំបន់ហ្គាហ្សា ក៏បានបណ្ដាលឲ្យមនុស្សលើស ៣០,០០០ នាក់ រងរបួសផងដែរ ខណៈប្រជាជន ២.៣ លាននាក់កំពុងខ្វះជំនួយមនុស្សធម៌ ៕

ប្រែសម្រួលដោយ ៖ ជីវ័ន្ត

ប្រភព ៖ TASS

ចុចអាន ៖ គ្រាប់ផ្លោងជាច្រើនបាញ់រះចេញពី លីបង់ ហោះទៅកាន់ អ៊ីស្រាអែល