ការវាយប្រហារកំពុងបន្ត តែក្រុមហាម៉ាសថា កិច្ចព្រមព្រៀងបទឈប់បាញ់ជាមួយអ៊ីស្រាអែលជិតសម្រេចហើយ

ប្រធានក្រុមហាម៉ាសបានប្រាប់សារព័ត៌មាន នៅថ្ងៃអង្គារ ទី២១ ខែវិច្ឆិកា ថា ក្រុមសកម្មប្រយុទ្ធប៉ាឡេស្ទីនឈានទៅជិតកិច្ចព្រមព្រៀងបទឈប់បាញ់ជាមួយអ៊ីស្រាអែលហើយ ទោះបីជាការវាយប្រហារយ៉ាងសាហាវទៅលើហ្គាហ្សានៅតែបន្ត ហើយគ្រាប់រ៉ុក្កែតកំពុងត្រូវបានបាញ់ចូលអ៊ីស្រាអែលក៏ដោយ។

លោក Ismail Haniyeh បាននិយាយនៅក្នុងសេចក្តីថ្លែងការណ៍មួយផ្ញើទៅកាន់សារព័ត៌មាន Reuters តាមរយៈជំនួយការរបស់លោកថាមន្ត្រីក្រុមហាម៉ាស «ជិតឈានដល់កិច្ចព្រមព្រៀងបទឈប់បាញ់» ជាមួយអ៊ីស្រាអែល ហើយក្រុមនេះបានឆ្លើយតបទៅនឹងអ្នកសម្របសម្រួលកាតា។

ទោះយ៉ាងណា មិនទាន់មានព័ត៌មានលម្អិតបន្ថែមអំពីលក្ខខណ្ឌនៃកិច្ចព្រមព្រៀងនៅឡើយទេ។

ដោយឡែកប្រធានាធិបតី​សហរដ្ឋ​អាមេរិក លោក ចូ បៃដិន បាន​និយាយ​កាល​ពី​ថ្ងៃ​ចន្ទ​ ដោយលោក​ជឿ​ជាក់​ថា ​កិច្ច​ព្រម​ព្រៀង​មួយ​ជិត​មក​ដល់​ហើយ។ អ្នកនាំពាក្យសេតវិមានលោក John Kirby បាននិយាយអំពីកិច្ចព្រមព្រៀងមួយក្នុងគោលបំណងធានាឱ្យមានការដោះលែងចំណាប់ខ្មាំងមួយចំនួនដែលឃុំខ្លួននៅហ្គាហ្សា និងផ្អាកការប្រយុទ្ធដែលនឹងអនុញ្ញាតឱ្យមានជំនួយចាំបាច់ជាច្រើនចូលទៅក្នុងតំបន់ឡោមព័ទ្ធ៕

ប្រែសម្រួល៖ សន្យា

ប្រភព៖ Reuters

ចុច​អាន៖ លោក បៃដិន ថា កិច្ចព្រមព្រៀងដោះលែង​ចំណាប់ខ្មាំងជាមួយក្រុមហាម៉ាស ជិតសម្រេចបានមែនទែនហើយ

ចុចអាន៖ អ៊ីស្រាអែល ទម្លាយពីកម្លាំងសរុបរបស់ក្រុមហាម៉ាសដែលហ៊ានបើកការវាយ​ប្រហារកាលពីថ្ងៃទី៧ ខែតុលា