Tesla ប្រហែលដឹកឡានអគ្គិសនី Cybertruck ត្រឹម ១០ គ្រឿងប៉ុណ្ណោះ ឲ្យអតិថិជននៅចុងខែនេះ

បើតាមការបញ្ជាក់ពីលោក Javier Verdura នាយកផ្នែករចនាផលិតផលសកលរបស់ក្រុមហ៊ុន Tesla បានឲ្យដឹងថា ក្រុមហ៊ុនប្រហែលជាដឹកជញ្ជូនឡានអគ្គិសនី Cybertruck ចំនួន ១០ គ្រឿងប៉ុណ្ណោះ​​ទៅឲ្យអតិថិជនដែលបានកុម្ម៉ង់នៅចុងខែវិច្ឆិកានេះ ។

ទោះយ៉ាងណាក៏ដោយ តួលេខនេះគឺនៅឆ្ងាយពីការបញ្ជាទិញខ្លាំងមែនទែន ដោយសារតែកន្លងមកមានការកុម៉្មង់ជាង ២ លានគ្រឿងឯណោះសម្រាប់រថយន្តប្រភេទនេះ ហើយចំពោះអតិថិជន ១០ នាក់ដំបូង​ដែលនឹងទទួលបានឡាននេះមុនគេ ក៏មិនទាន់ដឹងច្បាស់ថាជានរណានៅឡើយនោះដែរ ។

ពាក់ព័ន្ធនឹងបញ្ហានេះ គេក៏នៅមិនទាន់ដឹងច្បាស់ឡើយដែរថាតើរថយន្តអគ្គិសនី Cybertruck របស់ក្រុមហ៊ុន Tesla គ្រោងនឹងចែកចាយចំនួនប៉ុន្មានគ្រឿងសម្រាប់អតិថិជនក្នុងឆ្នាំនេះ ។

ដោយឡែកកាលពីដើមខែវិច្ឆិកានេះ ក្រុមហ៊ុនបានព្រមានថា នឹងពិន័យអ្នកលក់ឡានបន្តចំនួន ៥ ម៉ឺនដុល្លារ ប្រសិនបើអតិថិជន Cybertruck លក់ឡានវិញក្នុងរយៈពេលមួយឆ្នាំដំបូង ។

គួរឲ្យដឹងថា នាយកប្រតិបត្តិក្រុមហ៊ុន Tesla ធ្លាប់បាននិយាយពីគោលបំណងរបស់ក្រុមហ៊ុន នឹងផលិតរថយន្ត Cybertruck ឲ្យបានប្រហែល ២៥ ម៉ឺនគ្រឿងក្នុងមួយឆ្នាំនៅឆ្នាំ ២០២៥ ៕

ប្រែសម្រួល៖ នាង រតនៈ

ប្រភព៖​ Business Insider