UNICEF៖ តំបន់ហ្គាហ្សា ជាកន្លែងគ្រោះថ្នាក់បំផុតលើពិភពលោក សម្រាប់កុមារ

ប្រធានទីភ្នាក់ងារកុមាររបស់អង្គការសហប្រជាជាតិ (UNICEF) កាលពីថ្ងៃពុធទី២២ខែវិច្ឆិកា បានហៅតំបន់ហ្គាហ្សាស្ទ្រីប ថាជា “កន្លែងដ៏គ្រោះថ្នាក់បំផុតក្នុងពិភពលោកសម្រាប់កុមារ” ហើយនិយាយថា កិច្ចព្រមព្រៀងបទឈប់បាញ់រវាងអ៊ីស្រាអែលនិងក្រុមហាម៉ាស គឺមិនគ្រប់គ្រាន់ឡើយ ដើម្បីសង្គ្រោះជីវិតរបស់ពួកគេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នាយកប្រតិបត្តិ UNICEF លោកស្រី Catherine Russell បានប្រាប់ក្រុមប្រឹក្សាសន្តិសុខអង្គការសហប្រជាជាតិថា កុមារជាង៥៣០០នាក់ បានបាត់បង់ជីវិតក្នុងតំបន់ហ្គាហ្សា ចាប់តាំងពីការវាយប្រហាររបស់ចលនាហាម៉ាសនៅថ្ងៃទី៧ខែតុលា លើប្រទេសអ៊ីស្រាអែល ពោលគឺស្មើនឹង៤០%នៃចំនួនអ្នកស្លាប់សរុប។

លោកស្រី Russell ដែល​ទើប​តែ​វិលត្រលប់​ពី​ដំណើរ​ទៅ​តំបន់​ហ្គាហ្សា​ភាគ​ខាង​ត្បូង ​បាន​និយាយ​ថា “នេះ​ជា​រឿង​មិន​ធ្លាប់​មាន ខ្ញុំ​ត្រូវបាន​លងបន្លាច​ដោយ​អ្វី​ដែល​ខ្ញុំ​​ឃើញ និង​ឮ”។

ទោះបីជាយ៉ាងណាក៏ដោយ លោកស្រី Russell ស្វាគមន៍កិច្ចព្រមព្រៀងដែលសម្រេចបានកាលពីថ្ងៃពុធដោយអ៊ីស្រាអែលនិងក្រុមហាម៉ាស ដើម្បីដោះលែងចំណាប់ខ្មាំង និងផ្អាកការប្រយុទ្ធគ្នាយ៉ាងសាហាវ ក៏ដូចជាការទម្លាក់គ្រាប់បែកនៅតំបន់ហ្គាហ្សា។

លើសពីនេះ លោកស្រីនិយាយថា កុមារចំនួន១២០០នាក់ទៀត ត្រូវបានគេជឿថា កំពុងជាប់នៅក្រោមគំនរបាក់បែកនៃអគារដែលរងការទម្លាក់គ្រាប់បែក។

មិនត្រឹមប៉ុណ្ណឹង UNICEF ប៉ាន់ប្រមាណថា បញ្ហាកង្វះអាហារូបត្ថម្ភស្រួចស្រាវចំពោះកុមារ អាចកើនឡើងជិត៣០%នៅហ្គាហ្សា ក្នុងរយៈពេលប៉ុន្មានខែខាងមុខ។

យោងតាមអាជ្ញាធរអ៊ីស្រាអែល មនុស្សប្រហែល២៤០នាក់ រាប់ចាប់ពីទារករហូតដល់មនុស្សចាស់ គឺត្រូវបានចាប់ជាចំណាប់ខ្មាំង ក្នុងអំឡុងការវាយប្រហារកាលពីថ្ងៃទី៧ខែតុលា ដោយក្រុមសកម្មប្រយុទ្ធហាម៉ាស ដែលបានសម្លាប់មនុស្សប្រហែល១២០០នាក់នៅក្នុងប្រទេសអ៊ីស្រាអែល៕

ប្រែសម្រួល៖ Vann Vann

ប្រភព៖ CNA

ចុចអាន៖ ស្រ្តីប៉ាឡេស្ទីន៦០នាក់ ស្ថិតក្នុងចំណោមអ្នកទោសទាំង៣០០នាក់ ដែលអ៊ីស្រាអែល នឹងដោះលែង