អាមេរិក ដុតកម្តៅនៅអ៊ីរ៉ាក់ ក្រោយសម្លាប់អ្នកប្រយុទ្ធគាំទ្រអ៊ីរ៉ង់ ៨នាក់

រដ្ឋាភិបាលទីក្រុងបាកដាដ បានថ្កោលទោសសហរដ្ឋអាមេរិក ចំពោះការវាយឆ្មក់តាមអាកាសជាបន្តបន្ទាប់ ដែលបានសម្លាប់យុទ្ធជនគាំទ្រដោយអ៊ីរ៉ង់ចំនួន៨នាក់ ដោយថា​ នេះគឺជាការរំលោភលើដែនអធិបតេយ្យអ៊ីរ៉ាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកនាំពាក្យរដ្ឋាភិបាលលោក Bassem al-Awadi និយាយថា សហរដ្ឋអាមេរិកមិនបានធ្វើទំនាក់ទំនងជាមួយអ៊ីរ៉ាក់ អំពីការវាយប្រហារលើទីតាំងកងជីវពលនៅភាគខាងត្បូងទីក្រុងបាកដាដ កាលពីថ្ងៃអង្គារនិងព្រឹកព្រលឹមថ្ងៃពុធទេ។ ការ​វាយ​ប្រហារទាំងនោះ ​គឺជា​ការ​រំលោភ​បំពានដែល​មិន​អាច​ទទួល​យក​បានទាល់តែសោះ ​ចំពោះ​អធិបតេយ្យ​អ៊ីរ៉ាក់។

កងជីវពលគាំទ្រអ៊ីរ៉ង់ Kataib Hezbollah ឬត្រូវបានគេស្គាល់ថាជាកងពលតូច Hezbollah បានបញ្ជាក់កាលពីថ្ងៃពុធថា យុទ្ធជនខ្លួនចំនួន៨នាក់ ត្រូវបានសម្លាប់ក្នុងការវាយប្រហាររបស់សហរដ្ឋអាមេរិក បន្ទាប់មក បានព្រមានថា នឹងមានការវាយបកទៅវិញ។

ទោះបីជាយ៉ាងណាក៏ដោយ ទីបញ្ជាការកណ្តាលរបស់សហរដ្ឋអាមេរិកនិយាយថា ការវាយប្រហារនេះគឺដើម្បីសងសឹកចំពោះការវាយប្រហារប្រឆាំងសហរដ្ឋអាមេរិក និងកងកម្លាំងចម្រុះដោយស្នាដៃអ៊ីរ៉ង់ និងក្រុមដែលគាំទ្រដោយអ៊ីរ៉ង់។

មន្ទីរបញ្ចកោណបញ្ជាក់ថា ចាប់តាំងពីសង្រ្គាមនៅតំបន់ហ្គាហ្សា ផ្ទុះឡើងកាលពីថ្ងៃទី៧ខែតុលាមក កងកម្លាំងអាមេរិកដែលដាក់ពង្រាយនៅក្នុងប្រទេសអ៊ីរ៉ាក់និងស៊ីរី បានរងការវាយប្រហារយ៉ាងហោចណាស់៦៦ដង ដោយបណ្តាលឲ្យបុគ្គលិកជាង៦០នាក់រងរបួស។

ការវាយប្រហារថ្មីបំផុតបានកើតឡើងកាលពីថ្ងៃចន្ទ ដែលកងជីវពលគាំទ្រដោយអ៊ីរ៉ង់ បានបាញ់មីស៊ីលផ្លោងរយៈចម្ងាយជិតប្រឆាំងនឹងសហរដ្ឋអាមេរិក និងកងកម្លាំងចម្រុះ នៅឯមូលដ្ឋានអាកាស Al-Asad។

គួរបញ្ជាក់ថា អាមេរិកមានទាហានប្រហែល២៥០០នាក់នៅក្នុងប្រទេសអ៊ីរ៉ាក់ និងប្រហែល៩០០នាក់នៅស៊ីរី ដែលជាផ្នែកមួយនៃកិច្ចខិតខំប្រឹងប្រែងដើម្បីទប់ស្កាត់ការកកើតឡើងវិញនៃក្រុម ISIS៕

ប្រែសម្រួល៖ Vann Vann

ប្រភព៖ CNA

ចុចអាន៖ អាមេរិក បើកការវាយ ប្រហារ អាកាសសងសឹក លើមូលដ្ឋានកងឆ្មាំ បដិវត្តន៍ឥស្លាមអ៊ីរ៉ង់ នៅ អ៊ីរ៉ាក់