ព័ត៌មានអន្ដរជាតិ

កូរ៉េខាងត្បូង បង្គាប់ឲ្យ ជប៉ុន សងការខូចខាតដល់ទាសករផ្លូវភេទសម័យសង្គ្រាមក្នុងម្នាក់ ១៥ ម៉ឺនដុល្លារ

បានផុស

១ year មុន

នៅ

ថ្ងៃសុក្រ ២៤ វិច្ឆិកា ២០២៣

ដោយ

តុលាការកំពូលរបស់កូរ៉េខាងត្បូងកាលពីថ្ងៃព្រហស្បតិ៍បានបង្គាប់បញ្ជាឲ្យរដ្ឋាភិបាលជប៉ុនបង់ថ្លៃសងការខូចខាតទៅដល់ទាសករផ្លូវភេទក្នុងសម័យសង្គ្រាម បន្ទាប់ពីបានទាត់ចោលបណ្ដឹងដែលដាក់ដោយក្រុមសាច់ញាតិរបស់ពួកគេទៅកាន់តុលាការជាន់ទាប ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តុលាការកំពូលក្នុងទីក្រុងសេអ៊ូលបានចេញសាលក្រមនេះ បន្ទាប់ពីបានពិនិត្យពិច័យលើការវិនិច្ឆ័យរបស់តុលាការជាន់ទាបដែលទាត់ចោលការទាមទាររបស់ដើមបណ្ដឹងចំនួន ១៦ រូប ខណៈដែលពួកគេម្នាក់ៗប្ដឹងទារទឹកប្រាក់ចំនួន ២០០ លានវ៉ុន ឬប្រហែល ១៥ ម៉ឺនដុល្លារ ជាសំណងសម្រាប់ការឈឺចាប់ផ្លូវចិត្ត និងផ្លូវកាយ ។

តុលាការនៅទីក្រុងសេអ៊ូលបានកំណត់ និងសម្រេចទៀតថា រដ្ឋាភិបាលជប៉ុនត្រូវទទួលខុសត្រូវចំពោះថ្លៃខូចខាតតាមការអះអាងដោយដើមបណ្តឹង ខណៈនៅក្នុងសេចក្តីសម្រេចនោះទៀតសោត តុលាការបានលើកឡើងថា “នៅក្រោមច្បាប់អន្តរជាតិ វាគឺជារឿងសមហេតុផលសម្រាប់ជប៉ុនក្នុងការទទួលស្គាល់យុត្តាធិការរបស់តុលាការកូរ៉េខាងត្បូង” ។

តុលាការបញ្ជាក់ថា “ការកៀរគរ ក៏ដូចជាការលួងលោមស្ត្រីឲ្យធ្វើជាទាសករផ្លូវភេទនៅលើឧបទ្វីបកូរ៉េ គឺជាអំពើខុសច្បាប់ ហើយគួរតែមានការផ្ដល់សំណងណាមួយជាទីគាប់ចិត្ត” ។ ប៉ុន្តែអំឡុងពេលសេចក្ដីសម្រេចនោះ មិនមានមន្ត្រីរដ្ឋាភិបាលជប៉ុនណាម្នាក់ចូលរួមក្នុងដំណើរការនេះឡើយ ខណៈទីក្រុងតូក្យូប្រកាន់ជំហរថា បណ្តឹងនេះគួរត្រូវបានច្រានចោលដោយផ្អែកលើអភ័យឯកសិទ្ធិអធិបតេយ្យភាព ។

ទន្ទឹមនោះ សេចក្តីសម្រេចនេះនឹងត្រូវបិទបញ្ចប់ ប្រសិនបើរដ្ឋាភិបាលជប៉ុនមិនប្តឹងឧទ្ធរណ៍បកទៅតុលាការកំពូលរបស់កូរ៉េខាងត្បូងវិញ ។ ទោះយ៉ាងណា អនុរដ្ឋមន្ត្រីការបរទេសជប៉ុនលោក Okano Masataka បានធ្វើការតវ៉ាជាមួយឯកអគ្គរដ្ឋទូតកូរ៉េខាងត្បូងប្រចាំនៅប្រទេសជប៉ុន លោក Yun Duk-min រួចទៅហើយ ដោយលោកលើកឡើងថា សេចក្តីសម្រេចនេះពិតជាគួរឲ្យសោកស្តាយជាទីបំផុត ។

លោក Okano បាននិយាយថា រដ្ឋាភិបាលជប៉ុនមិនអាចទទួលយកសេចក្តីសម្រេចដែលបដិសេធអភ័យឯកសិទ្ធិអធិបតេយ្យដូចមានចែងក្នុងច្បាប់អន្តរជាតិ ក៏ដូចជាការទទួលស្គាល់ការទាមទាររបស់ដើមបណ្តឹងនោះទេ ហើយរដ្ឋាភិបាលទីក្រុងតូក្យូសូមរក្សាជំហរថា បញ្ហាពាក់ព័ន្ធនឹងទាសករផ្លូវភេទសម័យសង្គ្រាម គឺត្រូវបានដោះស្រាយរួចរាល់ទាំងស្រុងទៅហើយនៅអំឡុងឆ្នាំ ១៩៦៥ នៅពេលដែលប្រទេសជប៉ុន និងកូរ៉េខាងត្បូងនៅមានទំនាក់ទំនងទ្វេភាគីធម្មតា ។

គួរបញ្ជាក់ថា អធិរាជជប៉ុនបានធ្វើអាណានិគមលើឧបទ្វីបកូរ៉េពីឆ្នាំ ១៩១០ ដល់ឆ្នាំ ១៩៤៥ ខណៈស្ត្រីអាស៊ីប្រមាណ ៤០ ម៉ឺននាក់ដែលភាគច្រើនមកពីប្រទេសចិន និងឧបទ្វីបកូរ៉េត្រូវបានបង្ខិតបង្ខំ បោកប្រាស់ ឬចាប់ពង្រត់ឲ្យធ្វើជាទាសករផ្លូវភេទនៅឯផ្ទះបនយោធាជប៉ុន ទាំងនៅមុន និងអំឡុងពេលសង្គ្រាមផ្ទុះឡើងនៅតំបន់ប៉ាស៊ីហ្វិក ៕