ក្រោយអនុវត្តបទឈប់បាញ់ រថយន្តដឹកជំនួយ៣គ្រឿងដំបូង ចូលទៅក្នុងតំបន់ ហ្គាហ្សា

តាមសេចក្តីរាយការណ៍របស់ Aljazeera, រថយន្តជំនួយដំបូងចំនួន៣គ្រឿង បានចូលទៅក្នុងតំបន់ហ្គាហ្សាស្ទ្រីប ដោយក្នុងនោះមានពីរគ្រឿងដឹកប្រេងឥន្ធនៈ ចំណែកមួយគ្រឿងទៀតដឹកហ្គាស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

រថយន្តទាំងនេះ ត្រូវបានគេឃើញចតនៅចំណត ហើយនឹងត្រូវផ្ទេរទៅកាន់ស្ថានីយ៍នានា ក្នុងពេលឆាប់ៗ។

រថយន្តដឹកជំនួយទាំងនេះ បានចូលទៅក្នុងតំបន់ហ្គាហ្សា បន្ទាប់ពីអ៊ីស្រាអែលនិងក្រុមហាម៉ាស ចាប់ផ្តើមអនុវត្តបទឈប់បាញ់ជាផ្លូវការរយៈពេល៤ថ្ងៃ ខណៈចំណាប់ខ្មាំងដែលឃុំឃាំងនៅតំបន់ហ្គាហ្សាស្ទ្រីប នឹងត្រូវដោះលែង ជាថ្នូរនឹងអ្នកទោសប៉ាឡេស្ទីន។

បន្ទាប់ពីការចរចាដ៏យូរ ការផ្អាកបាញ់បានចាប់ផ្តើមនៅម៉ោង៧ព្រឹក (ម៉ោងនៅអ៊ីស្រាអែល) ហើយនៅម៉ោង៤រសៀល ក្រុមដំបូងនៃចំណាប់ខ្មាំងជាស្រ្តីនិងកុមារចំនួន១៣នាក់ នឹងត្រូវ ដោះលែងចេញពីតំបន់ហ្គាហ្សា បន្ទាប់មក មានការដោះលែងអ្នកទោសប៉ាឡេស្ទីន (មិនបញ្ជាក់ចំនួន) ចេញពីពន្ធនាគារអ៊ីស្រាអែល។ 

ក្នុងរយៈពេល៤ថ្ងៃ ចំណាប់ខ្មាំងយ៉ាងតិច៥០នាក់ ត្រូវបានគេរំពឹងថានឹងដោះលែង ដោយបន្សល់ទុកចំណាប់ខ្មាំង១៩០នាក់ទៀត នៅក្នុងដៃរបស់ក្រុមសកម្មប្រយុទ្ធប៉ាឡេស្ទីន។

ក្នុងរយៈពេលដូចគ្នានេះ អ្នកទោសប៉ាឡេស្ទីនប្រមាណ១៥០នាក់ ត្រូវគេរំពឹងថានឹងដោះលែង ហើយជំនួយបន្ថែមក៏នឹងបញ្ជូនចូលទៅក្នុងតំបន់ហ្គាហ្សាផងដែរ៕

ប្រែសម្រួល៖ Vann Vann

ប្រភព៖ Aljazeera

ចុចអាន៖ អ៊ីស្រាអែល-ហាម៉ាស ចាប់ផ្តើមបទឈប់បាញ់រយៈពេល៤ថ្ងៃជាផ្លូវការ