រុស្ស៊ី​ ​បើកការវាយ​ប្រហារ​ដោយ​ដ្រូន​ធំ​បំផុតលើ​ អ៊ុយក្រែន ​និងផ្តោតសំខាន់លើក្រុង Kyiv

កងទ័ពអាកាសអ៊ុយក្រែននិយាយថា រុស្ស៊ីបានធ្វើការវាយប្រហារដោយយន្តហោះគ្មានមនុស្សបើកដ៏ធំបំផុតរបស់ខ្លួន ចាប់តាំងពីការចាប់ផ្តើមនៃការលុកលុយ ដោយផ្តោតសំខាន់ទៅលើរដ្ឋធានី Kyiv ខ្លាំងជាងគេ។

កងកម្លាំងអាកាសបាននិយាយកាលពីថ្ងៃសៅរ៍ថា រុស្ស៊ីបានបាញ់បង្ហោះយន្តហោះគ្មានមនុស្សបើកអត្តឃាតផលិតដោយអ៊ីរ៉ង់ចំនួន ៧៥ គ្រឿង ប្រឆាំងនឹងតំបន់យ៉ាងហោចណាស់ចំនួន ៦ រួមទាំងទីក្រុង Kyiv ផងដែរ។ ក្នុងពេលដែល​ក្រសួងការពារជាតិអ៊ុយក្រែនបាននិយាយថា យន្តហោះគ្មានមនុស្សបើកជាង ៦០ គ្រឿងត្រូវបានបាញ់ទម្លាក់ពីលើរដ្ឋធានី និងតំបន់ជុំវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលក្រុង Kyiv លោក Vitali Klitschko បាននិយាយថា យ៉ាងហោចណាស់មនុស្ស៥ នាក់ រួមទាំងកុមារអាយុ ១១ ឆ្នាំម្នាក់បានរងរបួស ហើយការធ្លាក់កំទេចកំទីពីយន្តហោះគ្មានមនុស្សបើកបានធ្វើឲ្យខូចខាតអគារជាច្រើន។​ ការវាយប្រហារនេះបានបណ្តាលឲ្យដាច់ចរន្តអគ្គិសនីនៅក្នុងអគារលំនៅដ្ឋានចំនួន ៧៧និងសំណង់ចំនួន ១២០ផ្សេងទៀតនៅក្នុងទីក្រុង Kyiv ។

ប្រធានាធិបតីអ៊ុយក្រែនលោក Volodymyr Zelenskyy បានកត់សម្គាល់នៅក្នុងការបង្ហោះប្រព័ន្ធផ្សព្វផ្សាយសង្គមថា ប្រទេសរុស្ស៊ីបានបើកការវាយប្រហារនៅថ្ងៃនៃការប្រារព្ធពិធីបុណ្យ Holodomor ថ្ងៃរំលឹកដល់ទុរ្ភិក្សឆ្នាំ ១៩៣២-៣៣ ។ លោកបាន​ហៅ​ការ​វាយ​ប្រហារ​នោះ​ថា​ជា​អំពើ​ភេរវកម្ម​ដោយ​ចេតនា ហើយការ​ដឹក​នាំ​របស់​រុស្ស៊ី ហាក់​មាន​មោទនភាព​ចំពោះ​សមត្ថភាព​របស់​ខ្លួន​ក្នុង​ការ​សម្លាប់​មនុស្ស។

គួរបញ្ជាក់ថា រហូតមកដល់ពេលនេះ សង្គ្រាមរវាងរុស្ស៊ី និងអ៊ុយក្រែនដែលផ្ទុះឡើងកាលពីថ្ងៃទី២៤ ខែកុម្ភៈ ឆ្នាំ២០២២ នៅតែបន្តអូសបន្លាយពេល និងមិនមានសញ្ញាថមថយណាមួយឡើយ ខណៈសហរដ្ឋអាមេរិក និងសម្ព័ន្ធមិត្តក៏បានផ្ដល់កញ្ចប់ជំនួយយោធាទៅឲ្យរដ្ឋាភិបាលទីក្រុងកៀវក្នុងទំហំទឹកប្រាក់រាប់រយពាន់លានដុល្លារផងដែរ ៕

ប្រែសម្រួល៖ សាង ស្រីល័ក្ខ

ប្រភព៖NHK

ចុចអាន៖ស្ងាត់ៗ រុស្ស៊ី បើកការវាយលុកលើកទី ៣ ទៅលើតំបន់ភាគខាងកើត អ៊ុយក្រែន