មិនទាន់ជាប់ឆ្នោតផង លោក ត្រាំ ប្រកាសដកអាមេរិក ចេញពីស្ថាប័ននិងកិច្ចព្រមព្រៀងធំៗបាត់ទៅហើយ

ត្បិតការបោះឆ្នោតជ្រើសរើសប្រធានាធិបតីអាមេរិក នឹងចូលមកដល់នៅឆ្នាំក្រោយ ប៉ុន្តែលោក ដូណាល់ ត្រាំ ត្រូវបានគេមើលឃើញថា ជាបេក្ខជនឈានមុខឈ្នះការតែងតាំងខាងគណបក្សសាធារណរដ្ឋ ទៅតទល់ជាមួយអ្នកប្រជាធិបតេយ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងអំឡុងយុទ្ធនាការឃោសនាបោះឆ្នោត លោក ត្រាំ បានប្រកាសពីគោលនយោបាយជាច្រើន ហើយអ្វីដែលគេចាប់អារម្មណ៍ខ្លាំង គឺលោកបានប្រកាសដកសហរដ្ឋអាមេរិក ចេញពីអង្គការណាតូ និងលុបចោលកិច្ចព្រមព្រៀងពាណិជ្ជកម្មអាស៊ីប៉ាស៊ីហ្វិក។

កាលពីចុងខែតុលា លោកត្រាំ បានពិភាក្សាអំពីលទ្ធភាពនៃការដកប្រទេសចេញពីអង្គការណាតូ ឬកាត់ជំនួយរបស់អាមេរិកចំពោះប្លុកនេះ ប្រសិនបើគាត់ឈ្នះការបោះឆ្នោតឆ្នាំ២០២៤។

អតីតប្រធានាធិបតីអាមេរិករូបនេះ បានបង្ហាញជំហរច្បាស់ៗ ក្នុងការចាកចេញពីអង្គការណាតូ ឬសម្ព័ន្ធភាពយោធានៅសេសសល់ផ្សេងទៀត ប្រសិនបើសមាជិកអឺរ៉ុបរបស់ខ្លួន បង្កើនការចំណាយលើវិស័យការពារជាតិនិងលុបចោលមាត្រា៥នៃសន្ធិសញ្ញាអាត្លង់ទិកខាងជើង ដែលចាត់ទុក ការ​វាយ​ប្រហារ​លើ​រដ្ឋ​ជា​សមាជិកណា​មួយ ​ជា​ការ​វាយ​ប្រហារ​លើ​ប្រទេស​ទាំង៣១។

ដោយឡែក កាលពីថ្ងៃអាទិត្យទី១៩ខែវិច្ឆិកា លោក ត្រាំ ក៏បានប្រកាសលុបចោលកិច្ចព្រមព្រៀងពាណិជ្ជកម្មអាស៊ីប៉ាស៊ីហ្វិក (TTP) ដែលជំរុញដោយប្រធានាធិបតីអាមេរិក ចូ បៃដិន ផងដែរ បើជាប់ឆ្នោត។

ថ្លែងទៅកាន់អ្នកគាំទ្រនៅរដ្ឋ Iowa, លោក អះអាងថា លោកប្រឆាំងនឹងកិច្ចព្រមព្រៀងពាណិជ្ជកម្មក្នុងតំបន់ដែលកំពុងចរចាដោយរដ្ឋបាល បៃដិន ជាមួយប្រទេសចំនួន១៣ផ្សេងទៀត ដោយលើកហេតុផលថា វានឹងរារាំងដល់សង្វាក់ផលិតកម្មរបស់សហរដ្ឋអាមេរិក និងបណ្តាលឲ្យមនុស្សបាត់បង់ការងារធ្វើ។

លោកប្រកាសថា “ក្រោមការដឹកនាំរបស់រដ្ឋបាលបន្ទាប់ ផែនការរបស់លោក បៃដិន សម្រាប់ TPP ទី២ នឹងស្លាប់នៅថ្ងៃមួយ។ វាអាក្រក់ជាងផែនការទីមួយទៅទៀត ដោយគំរាមគំហែងដល់កសិករ និងអ្នកផលិតជាមួយនឹងភាពសាហាវយង់ឃ្នងសកលនិយម ហើយទំនោរខ្លាំងទៅកាន់តំបន់អាស៊ី”៕

ប្រែសម្រួល៖ Vann Vann

ប្រភព៖ ​CNA

ចុចអាន៖ លោក ត្រាំ ប្រកាសកម្ចាត់ចោល កិច្ចព្រមព្រៀងពាណិជ្ជកម្មអាស៊ីប៉ាស៊ីហ្វិក បើជាប់ឆ្នោត